एजेन्सी । च्याम्पियन्स लिगका सेमिफाइनल खेल आज मंगलबारदेखि सुरु हुँदैछन् । दुई चरणमा हुने सेमिफाइनलमा यसपटक इंग्ल्यान्डका दुई टिम र स्पेनका दुई टिमबीच प्रतिस्पर्धा हुँदैछ ।
आज मध्यरातमा इंग्लिस क्लब म्यान्चेस्टर सिटीले स्पेनिस क्लब रियल मड्रिडलाई इतिहाड मैदानमा निम्तो दिएको छ । यी दुई टिमबीचको खेल मध्यरात १२ः४५ बजे सुरु हुनेछ ।
म्यान्चेस्टर सिटीले क्वाटरफाइनलमा स्पेनिस क्लब एट्लेटिको मड्रिडलाई समग्रमा १–० गोलले पराजित गर्दै सेमिफाइनलमा स्थान बनाएको हो ।
अर्कोतर्फ रियलले इंग्लिस क्लब चेल्सीलाई समग्रमा ५–४ गोलको नतिजासहित सेमिफाइनमा स्थान बनाएको हो ।
आफ्ना घरेलु लिगमा दुबै टिम शीर्ष स्थानमा रहेका छन् । तसर्थ यी दुईटीमबीचको खेल रोमाञ्चक र प्रतिस्पर्धात्मक हुनेछ । रियल स्पेनिस लिग ला लिगामा शीर्ष स्थानमा रहँदै लगभग उपाधि उचाल्नेतर्फ अग्रसर रहँदा सिटी भने इंग्लिस प्रिमियर लिगमा उपाधिका लागि संघर्षरत छ । उसलाई लिभरपुलले पछ्याइरहेको छ ।
दुबै टोली आजको खेलमा जित निकाल्दै दोस्रो चरणका लागि सहज वातावरण बनाउन चाहन्छन् । दोस्रो चरणको खेल मे ५ मा रियलको मैदान सान्टियागो बर्नबेउमा हुनेछ ।
