काठमाडौं । नेपाली कांग्रेसका युवा नेता प्रदीप पौडेलले नेकपा एमालेका अध्यक्ष केपी शर्मा ओलीले कांग्रेसको घोषणापत्रमाथि गरेको टिप्पणी जनता झुक्याउन र लाज छोप्न रचिएको ‘निन्जा टेक्निक’को संज्ञा दिएका छन् ।
सामाजिक सञ्जालमार्फत धारणा राख्दै कांग्रेस केन्द्रीय सदस्य पौडेलले ओलीले आफ्नो सरकारका काण्डहरुको जति बचाउ गर्यो उत्ति नै नाङ्गिदै जाने समेत बताएका छन् ।
५ वर्ष सरकार सञ्चालन गर्न जनताले दिएको मत र मेण्डेटलाई तिरस्कार गरेर संविधान मास्ने सम्मको कुकर्म छोप्न अरूलाई गलिगौलच गरेर रक्षात्मक बन्न खोज्नु दरिद्रता रहेको समेत नेता पौडेलको आरोप छ ।
प्रदीप पौडेल लेख्छन् –
कांग्रेस घोषणापत्रको बारेमा ओलिको मनगढन्ते टिप्पणी जनता झुक्याउन र लाज छोप्न रचिएको निन्जा टेक्निक हो । राजनीतिक मर्यादा र निर्वाचनको संवेदनशीलताको सामान्य हेक्का नराखी खर्चिएका सस्ता शब्द कुण्ठाका पराकाष्टा हुन्। आफ्नो सरकारले विगतमा गरेका काण्डहरुलाई जति बचाउँ गर्छन् उति नाङ्गिदै जान्छन् ।
५ वर्ष सरकार सञ्चालन गर्न जनतले दिएको मत र मेण्डेटलाई तिरस्कार गरेर संविधान मास्ने सम्मको कुकर्म छोप्न अरूलाई गलिगौलच गरेर रक्षात्मक बन्न खोज्नु दरिद्रता हो । मत लिनका लागि घोषणापत्रमा निराधार र सतही सपना छर्ने, जनमतको कदर गर्न नसक्ने र वाचा गरिएका न्यूनतम कुरा पनि पुरा गर्न नसकेपछि अरूलाई आक्रोश पोख्ने कुरा लज्जाको विषय हो । यस्तो दरिद्रता देखाएर मत माग्ने जो कोहीलाई जनताले स्वतः अस्वीकार गर्नेछन् ।
जय नेपाल ।
