एजेन्सी । आईपीएल २०२२ को ५३ औँ खेलमा लखनउ सुपर जायन्ट्सले कोलकाता नाइट राइडर्सलाई ७५ रनले पराजित गरेको छ ।
पुणेस्थित महाराष्ट्र क्रिकेट एसोसिएसन स्टेडियममा भएको खेलमा टस हारेर पहिले ब्याटिङ गरेको लखनउले २० ओभरमा सात विकेट गुमाएर १७६ रन बनाएको थियो ।
जवाफमा कोलकाताको टोली १४.३ ओभरमा १ सय १ रनमा सिमित भयो । केकेआरका आन्द्रे रसेलको तुफानी इनिङ्स खेर गयो ।
कोलकाताको १०१ रनमा रसेलको ४५ रनको योगदान थियो । उनले १९ बलको इनिङ्समा तीन चौका र पाँच छक्का प्रहार गरे । १३ औं ओभरमा आवेश खानले रसेललाई पेभिलियन पठाए ।
यो खेलमा लखनउका दुई बलरले मेडेन थ्रो समेत गरे । केकेआरको इनिङ्समा मोहसिनले पहिलो ओभरको विकेट मेडेन बनाएका थिए ।
केकेआरको इनिङ्सको सातौं ओभरमा आवेश खानले विकेट मेडेन बोल्ड गरे । यो ओभरमा आवेशले नितिशलाई पेभिलियन पठाए र कुनै रन दिएनन् । प्लेयर अफ द म्याचको अवार्ड आवेशले पाए ।
यो जितसँगै लखनउको टोली गुजरातलाई पछि पार्दै अंक तालिकाको शीर्ष स्थानमा उक्लिएको छ । उसको ११ खेलबाट ८ जितसहित १६ अंक छ । लखनउको टोलीले तीन खेल मात्र हारेको छ । गुजरातको पनि ११ खेलबाट १६ अंक छ, तर नेट रन रेटमा लखनउ गुजरातभन्दा धेरै अगाडि छ । लखनउको नेट रन रेट ०.७०३ छ भने गुजरातको नेट रन रेट ०.१२० छ ।
यो हारसँगै कोलकाताको प्लेअफ पुग्ने आशामा धक्का लागेको छ । टोली प्लेअफको दौडबाट झण्डै बाहिरिसकेको छ । केकेआरको ११ खेलमा चार जित र सात हारका साथ आठ अंक छ । लखनउको अर्को खेल मे १० मा गुजरातसँग हुनेछ । जुन टोलीले त्यो खेल जित्छ अंक तालिकाको शीर्ष स्थानमा रहनेछ । त्यस्तै कोलकाताको टोलीले मे ९ मा मुम्बई इन्डियन्ससँग खेल्नेछ ।
