रास्वपाको प्रथम महाधिवेशनको उद्घाटन समारोहलाई सम्बोधन गर्दै लिङ्देनले राजसंस्थाको पक्षमा रहेका धेरै मतदाताले पनि रास्वपालाई विश्वास गरेर मत दिएको दाबी गरे।
उनले प्रधानमन्त्री बालेन्द्र शाह (बालेन) प्रति जनतामा विशेष अपेक्षा रहेको उल्लेख गर्दै केही मतदाताले बालेनले राजसंस्था पुनर्स्थापना गर्न भूमिका खेल्न सक्ने विश्वासका आधारमा समेत रास्वपालाई समर्थन गरेको बताए।
‘राजा चाहिन्छ भन्नेहरूको पार्टी राप्रपा हुँदाहुँदै पनि बालेनले राजा ल्याउँछन् भन्ने आशा गरेर धेरैले तपाईंहरूलाई भोट दिएका छन्। त्यसैले तपाईंहरूमाथि जनताको विशिष्ट अपेक्षा र जिम्मेवारी छ,’ उनले भने।
लिङ्देनले देशमा देखिएका समस्याको कारण केवल नेतृत्व मात्र नभई विद्यमान संविधान र संवैधानिक व्यवस्थासमेत रहेको धारणा राखे। संविधानमा आवश्यक सुधार नगरी मुलुकले अपेक्षित गति लिन नसक्ने उनको भनाइ थियो।
‘समस्या नेतामा मात्र छैन, संविधान र संवैधानिक व्यवस्थामा पनि छ। यो संविधानमा सुधार नगरी देश अगाडि बढ्न सक्दैन। तपाईंहरूसँग ऐतिहासिक अवसर छ,’ उनले भने।
तस्बिरः प्रदीप राज वन्त/रासस
