एजेन्सी । टी–२० विश्वकपको सुपर–१२ चरणमा अष्ट्रेलियाले आयरल्याण्डलाई ४२ रनले पराजित गरेको छ ।
ब्रिसबेनमा आयरल्याण्डका कप्तान एन्ड्रयु बालबर्नीले टस जितेर पहिले फिल्डिङ रोजेका थिए । निर्धारित २० ओभरको अन्त्यमा अस्ट्रेलियाले ५ विकेट गुमाएर १७९ रन बनाएको थियो ।
१८० रनको लक्ष्य पछ्याएको आयरल्याण्ड १८.१ ओभरमा १३७ रनमा अलआउट भयो । आयरल्याण्डका लोर्कन टकर ७१ रन बनाएर नटआउट रहे । दोस्रो ओभरमा पहिलो विकेट खसेपछि अन्तिमसम्म खेलमा रोमाञ्चक रहे तर टोलीलाई जित दिलाउन सकेनन् ।
अष्ट्रेलियाका बलरको अगाडि टोलीका अन्य कुनै पनि ब्याट्सम्यान टिक्न सकेनन् । यो जितसँगै अष्ट्रेलिया ५ अंकसहित समूह १ मा दोस्रो स्थानमा उक्लिएको छ । समूह १ मा न्यूजिल्याण्ड पहिलो स्थानमा छ ।
आयरल्याण्डको आधा टोली २५ रनमै प्याभेलियन फर्किएको थियो । तर, मध्यक्रमका ब्याट्सम्यान लोर्कन टक्करले अन्तिमसम्म ब्याटिङ गर्दै आयरल्याण्डलाई जितको आशा जगाए ।
उनी ७१ रन बनाएर नटआउट रहे । तर, अर्को तर्फबाट समर्थन नपाएपछि उनले टोलीलाई जित दिलाउन सकेनन् । उनी बाहेक आयरल्याण्डका कुनै पनि ब्याट्सम्यानले १५ रनभन्दा बढी रन बनाउन सकेनन् ।
बलिङमा अस्ट्रेलियाका ग्लेन म्याक्सवेल, एडम जाम्पा, प्याट कमिन्स र मिचेल स्टार्कले २–२ विकेट लिए । यस्तै, मार्कस स्टोइनिसले एक विकेट लिए । टोलीका अन्तिम ब्याट्सम्यान रनआउट भए ।
आयरल्याण्डका लागि लोर्कन टकरले ७१ रन बाहेक ग्यारेथ डेलानीले १४, मार्क एडेयरले ११ र पल स्टर्लिङले ११ रन बनाए । टोलीका अन्य कुनै पनि ब्याट्सम्यानले दोहोरो अंक छुन सकेनन् ।
यसअघि अष्ट्रेलियाका लागि कप्तान आरोन फिन्चले ४४ बलमा ६३ रन बनाएका थिए । उनले आफ्नो इनिङ्सका लागि प्लेयर अफ द म्याचको अवार्ड पाए । मार्कस स्टोइनिसले २५ बलमा ३५ र मिचेल मार्सले २८ रन बनाए । आयरल्याण्डका लागि ब्यारी म्याकार्थीले २९ रनमा ३ विकेट र जोसुवा लिटिलले २१ रनमा २ विकेट लिए ।
