काठमाडाैं । नेकपा एमालेका अध्यक्ष केपी शर्मा ओलीले गृहमन्त्री बालकृष्ण खाणलाई फोन गरेर हिजो बानेश्वरमा गरिएको प्रदर्शनमा प्रहरीको निरीहताका विषयमा जिज्ञासा राखेका छन् । ओली सोमबार कालु पाण्डेको समाधीस्थलमा पुगेका थिए । त्यहाँ आयोजित एक कार्यक्रमलाई सम्बोधन गर्दै ओलीले गृहमन्त्रीसँग टेलिफोन सम्वाद गरेको जानकारी गराएका हुन् ।
हिजो बानेश्वरस्थित संसद भवनमा भित्र एमसिसीसम्बन्धी सम्झौता पेश गरिरहँदा बाहिर भने नागरिक आन्दोलन चलेको थियो ।
त्यो आन्दोलनमा उपस्थितहरुले प्रहरीमाथि ढुंगामुडा गरेका थिए । त्यस क्रममा प्रहरीले नागरिकको खासै प्रतिकार गरेको थिएन बरु आफै भागेको थियो ।
सोही दृश्यलाई उद्धृत गर्दै एमाले अध्यक्ष ओलीले गृहमन्त्रीलाई फोन गरेको बताए । ओलीले भने 'बानेश्वरमा हेर्नुस् त तमासा ? के प्रहरीले पिटाइ मात्र खानुपर्ने हो ? आन्दोलनकारीलाई छुँनैहुँदैन भनेको हो ?'
ओलीले भने 'ल हेर्नुस् त २५ जनाले ढुंगा हानिरहेको छ उता डेढ सयजना प्रहरीले ढालले ढुंगा छेक्दै भागेको मात्र छ ।'
