काठमाडौँ । आईसीसी विश्वकप लिग टू अन्तर्गतको त्रिकोणात्मक सिरिज अन्तर्गत घरेलु टोली नेपालले पहिलो खेलमै जित निकालेको छ ।
बिहीबार कीर्तिपुरस्थित टियु मैदानमा सम्पन्न खेलमा नेपालले पपुवा न्युगिनी (पिएनजी)लाई ५२ रनले हराएको हो । नेपालले दिएको २९८ रनको विजयी लक्ष्य पछ्याएको पिएनजी ४७.१ ओभरमा अलआउट हुन पुग्यो ।
पिएनजीका लागि टोनी उराले ४४ बलमा ५० रनको अर्धशतकीय इनिङ्स खेल्दा नर्मन भनुआले पनि ५५ बलमा ६० रनको अर्धशतकीय इनिङ्स खेले । उनी रनआउट हुन पुगेका हुन् । अशाद भालाले ५३ बलमा ४२ रन जोडे । यस्तै, किप्लिन दोरीगाले ३४ बलमा २६ रन तथा चाल्र्स अमिनीले ४३ बलमा १४ रन बनाए ।
नेपालका लागि सन्दीप लामिछानेले चार विकेट लिए भने दिपेन्द्र सिंह ऐरीले दुई तथा कुशल मल्लले एक विकेट लिए । त्यसअघि टस हारेर पहिला ब्याटिङको निम्तो पाएको नेपालले ४९ दशमलव १ ओभरमा सबै विकेट गुमाउदै २९७ रनको योगफल बनायो । यो नेपालले एक दिवसीय खेलमा बनाएको हालसम्मकै उच्च स्कोर हो । नेपालले यसअघि २८७ रन बनाएको थियो ।
नेपालका सुरुआती व्याट्सम्यान आशिफ शेखले सर्वाधिक ११० रनको योगदान दिए । उनले ११० बल खेल्दै उनले दुई छक्का र १२ चौका प्रहार गरे । आसिफको यो अन्तर्राष्ट्रिय क्रिकेट करिअरको पहिलो एक दिवसीय शतक हो । आसिफ नेपालबाट एकदिवसीयमा शतक प्रहार गर्ने पाँचौ नम्बरका खेलाडी बने । यसअघि राष्ट्रिय क्रिकेट टोलीका पूर्वकप्तान पारस खड्का, रोहित पौडेल, दीपेन्द्रसिंह ऐरी र कुशल भुर्तेलले शतक प्रहार गरेका थिए ।
त्यस्तै आसिफले एकदिवसीय आफनो करिअरको एक हजार रनसमेत पूरा गरेका छन् । एक हजार रन पूरा गर्ने नेपालका उनी दोस्रो खेलाडी बने । यसअअघि नेपालका रोहित पौडेलले एकदिवसीयमा एक हजार रन पूरा गरेका थिए ।
आजको खेलमा सुरुआती अर्का ब्याट्सम्यान कुशल भुर्तेलले ४५ रनको योगदान दिए । उनले ५६ बलमा ६ चौकासहित ४५ रन जोडे । आसिफ शेख र कुशल भुर्तेलले पहिलो विकेटका लागि ११० रनको शतकीय साझेदारी गरेका थिए ।
रोहित पौडेल ३९ बलमा २ चौका र १ छक्कासहित ३० रनमा क्याच आउट भए । त्यस्तै ज्ञानेन्द्र मल्लले ११ रन जोडे भने दीपेन्द्रसिंह ऐरी ७ रनमा आउट भए । यसैगरी भीम सार्कीले ४४ रन, आरिफ शेखले १५, करण केसीले आठ, सन्दीप लामिछानेले सात, तथा सोमपाल कामीले चार रन जोडे । बलिङतर्फ पपुवा न्यूगिनीका सेमो कमिया एक्लैले पाँच विकेट लिए भने राइली हेकुरेले तीन विकेट र एलियो नाओले एक विकेट लिए झारे ।
नेपालले अब आइतबार यूएई, सोमबार पपुवा न्युगिनी र बिहीबार यूएईसँग खेल्नेछ । नेपाल शीर्ष तीनमा रहँदै आगामी जुन–जुलाईमा जिम्बावेमा हुने एकदिवसीय विश्वकप छनोट सोझै खेल्न बाँकी तीनै खेल जित्नुपर्ने हुन्छ ।
एक खेल हारेको खण्डमा नेपालले क्वालिफायर प्लेअफ खेल्नुपर्ने हुन्छ । यस्तै, ओडिआई मान्यता सोझै जोगाउन नेपालले अब तीन मध्ये एक खेल जित्नुपर्ने हुन्छ ।
यो नतिजासँगै नेपाल ३३ खेलमा १६ मा जित र १५ मा हारसहित ३४ अंकका साथ पाँचौं स्थानमा छ । यूएई ३२ खेलमा १४ मा जित र १५ मा हारसहित ३१ अंकका साथ छैटौं स्थानमा छ भने पपुवा न्युगिनी ३३ खेलमा ४ मा जित र २८ मा हारसहित ९ अंक जोड्दै पुछारमा छ ।
