काठमाडौँ । एकदिवसीय एसिया कप पाकिस्तानमा हुने उच्च सम्भावना रहेको छ । एसियन क्रिकेट काउन्सिल (एसिसी) ले आयोजनाको जिम्मा पाकिस्तानलाई दिएकोमा भारतले पाकिस्तानी भुमिमा कप नखेल्ने निर्णय गरेको थियो । भारत पाकिस्तान नजाने भएपछि एसिया कप स्थगित हुने चर्चा चल्दै आएको थियो । तर एसीसी अडानसँगै कप सेप्टेम्बर पहिलो सातामा पाकिस्तानमै हुने उच्च सम्भावना रहेको छ।
एसिसीले भारतले खेल्ने बाहेकका खेलहरु पाकिस्तानमा गर्ने तयारी गरेको छ । भारतको खेल भने तटस्थ भूमिमा हुने बताईएको छ । तटस्थ भूमिको रुपमा युएई, ओमान, श्रीलंका र इंग्ल्यान्ड मध्य एक देशको सम्भावना छ ।
गत वर्ष अक्टोबरमा बिसिसिआईका सचिव जय शायले भारत पाकिस्तान भ्रमण नगर्ने बताएका थिए । त्यसपछि बिसिसिआई र पाकिस्तान क्रिकेट बोर्डबीच एसिया कपलाई लिएर विवाद उत्पन्न भएको थियो । पाकिस्तानले पनि भारतले आफ्नो भुमिमा नखेले भारतमा आयोजना हुने २०२३ को विश्वकप नखेल्ने अडान लिएको छ ।
एसिया कपको समूह ए मा भारत, पाकिस्तान र एसिसी प्रिमियर कप विजेता टोली हुनेछन् । समूह बी मा श्रीलंका, बंगलादेश र अफगानिस्तान छन् । समूह चरण हुँदै सुपर खेलबाट फाइनल निर्धारण हुनेछ ।
नेपालले पनि अर्को महिना घरेलु मैदानमा हुने एसिसी प्रिमियर कप जितेमा एसिया कप खेल्नेछ । एसिसी प्रिमियर कप वैशाख ५ देखि १८ गतेसम्म हुनेछ । सेमिफाइनल हुँदै फाइनलमा उपाधि जित्न सके नेपालले इतिहासमा पहिलो पटक भारत र पाकिस्तानसँग खेल्न पाउनेछ ।
नेपालको समूहमा ओमान, कतार, मलेसिया र साउदी अरब छन् । समूह बी मा युएई, हङकङ, कुवेत, सिंगापुर र बहराइन छन् ।
