आइसिसी विश्वकप क्रिकेट अन्तर्गत मुम्बईको वान्खडे रंगशालामा सम्पन्न दिवारात्रि खेलमा दक्षिण अफ्रिकाले क्वीन्टन डी ककको व्यक्तिगत १७४ रन मद्दतले बंगलादेशलाई १४९ रनको विशाल अन्तरले पराजित गरेको छ ।
जितका लागि ३८३ रनको विशाल लक्ष पछ्याएको बंगलादेशको टोलीले ४६.४ ओभरमा सबै विकेट गुमाएर २३३ रन मात्र बनाएको थियो । नियमित अन्तरालमा विकेट गुमाएसँगै बंगलादेश निरन्तर दबाबमा परेको थियो ।
अघिल्लो क्रमका बंगलादेशी ब्याट्सम्यानहरु सस्तैमा आउट भएका थिए । अर्थात् तन्जिड हसन १२, लिटोन दास २२, नजमूल सान्टो ०, कप्तान शकिब अल हसन १ तथा अनुभवी ब्याट्सम्यान मुस्फिकर रहिम ८ रन बनाएर आउट भएका थिए । ५८ रनभित्र पाँच विकेट गुमाएको बंगलादेशले ८१ रन बनाउँदा छैटौं तथा १२२ रन बनाउँदा सातौं विकेट गुमाएको थियो ।
तर महमुदुल्लाहले अफ्रिकी बलरको प्रतिरोध झेल्दै व्यक्तिगत १११ रन बनाए ।
यसबाहेक मेहदी हसन मिर्जाले ११, नसुम अहमदले १९, हसन महमुदले १५ रन, मुस्तफाजुर रहमानले ११ तथा शोरिफोल इस्लामले अविजित ६ रनको योगदान गरे ।
अफ्रिकाका लागि गेराल्ड कोजीले तीन, मार्को यान्सेन, लिजाड विलियम्सन र कागिसो रबाडाले समान दुई दुई विकेट लिएका थिए भने केशव महाराजले एक विकेट लिएका थिए ।
यसअघि दक्षिण अफ्रिकाले टस जितेर पहिले ब्याटिङ गरेको थियो । अफ्रिकाले प्रारम्भिक ब्याट्सम्यान क्विन्टन डी ककको सानदार १७४ तथा हेनरिक क्लासेनको ९० रन मद्दतले पाँच विकेटको क्षतिमा ३८२ रन बनाएको थियो ।
अफ्रिकाका लागि रीजा हेन्ड्रीकले १२, रासी भान डर डुसेनले १, कप्तान एडेन मार्करमले ६०, डेभिड मिलरले ३४ तथा मार्को यान्सेनले १ रन बनाएका थिए ।
यो जितसँगै अफ्रिकाले ५ खेलबाट ८ अंक हासिल गरेको छ । अंक तालिकामा अफ्रिका दोस्रो स्थानमा उक्लेको छ । बंगलादेश भने ५ खेलबाट २ अंक सहित अंक तालिकाको पुछारमा छ ।
पछिल्लो अंक तालिका (शीर्ष चार टिम)
१. भारत – ५ खेल – १० अंक
२. दक्षिण अफ्रिका – ५ खेल – ८ अंक
३. न्युजील्यान्ड – ५ खेल – ८ अंक
४. अस्ट्रेलिया – ४ खेल – ४ अंक
