काठमाडौं । प्रधानमन्त्री कप एकदिवसीय राष्ट्रिय प्रतियोगितामा सुदूरपश्चिम प्रदेशले गण्डकी प्रदेशलाई १ सय ८ रनले हराएको छ । यससँगै लगातार तेस्रो जित हात पारेको सुदूरपश्चिम अंक तालिकाको शीर्ष स्थानमा उक्लिएको छ ।
जितको लागि २ सय २ रनको लक्ष्य पछ्याएको गण्डकीले ३०.२ ओभरमा अल आउट हुँदै ९३ रन मात्र बनायो । गण्डकीका आश्विानी रानाले सर्वाधिक २५ रन बनाए । कमल परियारले २२ रन बनाउदा अन्य कुनैपनि ब्याटरले दोहोरो अंकमा रन बनाउन सकेनन् ।
सुदूरको जितमा शेर मल्लले उत्कृष्ट ५ विकेट लिए । उनले ८.२ ओभरमा १ मेडनसहित २३ रन खर्चेर ५ विकेट लिएका हुन् ।
गजेन्द्र बोहराले २ विकेट लिदा भोज राज भट्ट, नरेन साउद र मिलन बोहराले १–१ विकेट लिए ।
त्यसअघि सिद्धार्थ रंगशाला भैरहवामा टस हारेर ब्याटिङको निम्तो पाएको सुदूरपश्चिमे २ सय १ रनमा अल आउट भएको थियो । सुदूरको लागि किरण ठगुन्नाले सर्वाधिक ६० रन बनाए । यस्तै, नारायण जोशीले ४६ रन बनाउदा नरेन १३, टेक रावत १५, राजु रिजाल १६ र शेर मल्लले १९ रन बनाए ।
गण्डकीका विपिन खत्री र अंकित सुवेदीले ३–३ विकेट लिए । कमल परियार र अमृत गुरुङले २–२ विकेट लिए ।
सुदूर ३ खेलमा ६ अंकका साथ शीर्षस्थानमा छ । एपीएफ २ खेलमा ४ अंकका साथ दोस्रो स्थानमा र नेपाल पुलिस २ खेलमा ४ अंकका साथ तेस्रो स्थानमा छ ।
