काठमाडौँ । जारी नेपाल प्रीमियर लिग (एनपिएल) पोखरा एभेन्जर्सले पहिलो जित निकालेको छ ।
लुम्बिनी लायन्सलाई १० विकेटले हराएउँदै यसअघिका दुई खेल गुमाएको पोखराले पहिलो जित निकालेको हो ।
पोखराले १७१ रनको लक्ष्य १६.५ ओभर खेल्दै बिनाविकेट गुमाई १७६ रन बनाएर पूरा गरेको थियो ।
यस खेलमा विभिन्न चार कीर्तिमानहरु बनेका छन् ।
एनपिएलमा पहिलो शतक
पोखराका ओपनर एन्ड्रिज गौसले शतक प्रहार गरे । यो एनपिएलको पहिलो शतक हो । उनले ५४ बलमा १२ चौका र ५ छक्काको मद्धतमा शतक पूरा गरे ।
१० विकेटको जित
पोखरा एनपीएलमा १० विकेटले विजयी हुने पहिलो टिम बनेको छ । यसअघि कुनै टोलीले यस्तो जित निकालेका छैनन् ।
छिटो अर्धशतक
शतक बनाएका गौस एनपीएलमा छिटो अर्धशतक पूरा गर्ने खेलाडी समेत बने । उनले २० बलमा अर्धशतक पूरा गरेका हुन् । यसअघि सुदूरपश्चिम रोयल्सका कप्तान दीपेन्द्रसिंह ऐरीले विराटनगरविरुद्ध २३ बलमा अर्धशतक बनाएका थिए ।
उच्च साझेदारी
पोखराका ओपनरद्वय गौस र दिनेश खरेलले लुम्बिनीविरुद्ध एनपिएलकै उच्च साझेदारी गरे । उनीहरुले अविजित १७६ रनको साझेदारी गरे ।
यसअघि उद्घाटन खेलमा जनकपुर बोल्ट्सका लाहिरु मिलान्था र हर्श ठाकेरले विराटनगरविरुद्ध तेस्रो विकेटका लागि अविजित ११६ रनको साझेदारी गरेका थिए । गौस र खरेलले यसलाई पछि पारेका हुन् ।
