काठमाडौं । सुदूरपश्चिम रोयल्स नेपाल प्रीमियर लिग (एनपिएल)को फाइनलमा प्रवेश गरेको छ ।
भर्खरै सम्पन्न खेलमा जनकपुर बोल्ट्सलाई ८ विकेटले हराउँदै सुदूरपश्चिम फाइनलमा प्रवेश गरेको हो । अर्कोतर्फ हारेपनी जनकपुरलाई फाइनल प्रवेश गर्ने अवसर भने बाँकी छ । उसले फाइनल प्रवेशका लागि कर्णाली याक्ससँग प्रतिस्पर्धा गर्नेछ ।
जनकपुरले दिएको १४० रनको लक्ष्य सुदूरपश्चिमले १८.३ ओभरमा २ विकेट गुमाएर भेट्टायो ।
उसका लागि ओपनर बिनोद भण्डारीले अर्धशतकीय इनिङ खेले । उनले ५८ रनको योगदान दिए । यस्तै सैफ जइबले ३२, ब्रेन्डन म्याकमुलेनले २५ तथा दिपेन्द्र सिंह ऐरीले अविजित २० रन बनाए ।
बलिङतर्फ जनकपुरका किशोर महतो र ललित राजवंशीले एक एक विकेट लिए ।
त्यसअघि कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ गरेको जनकपुरले निर्धारित २० ओभरमा ९ विकेट गुमाएर १३९ रन बनायो ।
जनकपुरका लागि जेम्स निशमले सर्वाधिक ४५ रन बनाए । शुभ कंशाकारले २६ रन बनाउदा हर्ष ठाकर र लाहिरु मिलान्थाले समान १२ तथा कप्तान आसिफ शेखले १० रन जोडे ।
सुदूरपश्चिमका लागि कप्तान दीपेन्द्रसिंह ऐरीले ३, सैफ जइबले २, अभिनास बोहरा २ र स्कट कुगलाइनले एक विकेट लिए ।
