काठमाडौं । नेपाल प्रिमियर लिग –एनपीएलको दोस्रो क्वालिफायर खेल आज हुँदै छ । दोस्रो क्वालिफायर खेलमा कर्णाली याक्सले जनकपुर बोल्ट्सको सामना गर्ने छ ।
दोस्रो क्वालिफायर खेल कीर्तिपुरस्थित अन्तर्राष्ट्रिय क्रिकेट मैदानमा दिउँसो १२ बजे हुने छ । कर्णाली याक्स बुधबार भएको एलिमिनेटर खेलमा बलियो प्रतिस्पर्धी चितवन राइनोजलाई हटाउँदै क्वालिफायरमा पुगेको हो ।
जनकपुर बोल्ट्स भने बुधबार नै भएको पहिलो क्वालिफायर खेलमा सुदूरपश्चिम रोयल्ससँग ८ विकेटले पराजित भएपछि दोस्रो क्वालिफायर खेल्न बाध्य भएको हो । दोस्रो क्वालिफायर खेलमा विजयी हुने टोलीले फाइनलमा उपाधिका लागि पहिलो क्वालिफायरको विजेता सुदूरपश्चिमसँग खेल्ने छ ।
कर्णाली याक्स र जनकपुर बोल्ट्सबीचको दोस्रो क्वालिफायर खेल निकै रोमाञ्चक हुने अनुमान गरिएको छ । कर्णाली याक्स प्रारम्भिक चरणको खेलबाट आठ अंक बटुल्दै तालिकामा चौथो भएर प्रतियोगिताको प्ले अफ चरणमा पुगेको हो ।
