काठमाडौँ। कान्तिपुर भेट डिष्ट्रिब्यूटर्स प्रालिका सञ्चालक अध्यक्ष सुना सुवेदी पक्राउ परेकी छिन् ।
केन्द्रीय अनुसन्धान ब्युरो लाजिम्पाटको टोलीले शुक्रबार सुवेदीलाई काठमाडौं-३१ शंखमुलबाट पक्राउ गरेको हो।
केन्द्रीय अनुसन्धान ब्युरोका अनुसार नेपाल सरकारको कृषि तथा पशुपंक्षी विकास मन्त्रालय अन्तर्गतको पशु सेवा विभागले जारी गरेको सिफारिस पत्र किर्ते गरी नेपालमा दर्ता नभएका पशु औषधि आयात गरिएको पाइएको थियो।
पशु सेवा विभाग अन्तर्गतको आयात–निर्यात सिफारिस, पशुजन्य उद्योग स्थापना तथा बिक्री वितरण अनुमति सम्बन्धी प्राविधिक समितिको निर्णयअनुसार कान्तिपुर भेट डिष्ट्रिब्यूटर्सलाई पशु फिड सप्लिमेन्ट, प्रोबायोटिक्स, भिटामिन, मिनरल, टक्सिन बाइन्डर आयात गर्न अनुमति दिइएको थियो।
तर, सो अनुमति पत्र किर्ते गरी नेपालमा दर्ता नभएका औषधिहरू विभिन्न भन्सार कार्यालयमा पेस गरी आयात गरिएको अनुसन्धानमा खुलेको छ।
उक्त कम्पनी र सञ्चालकबारे थप अनुसन्धान भइरहेको प्रहरीले जनाएको छ।
