काठमाडौँ । विराट कोहलीको ९३ रनको उत्कृष्ट इनिङ्सको मद्दतमा भारतले पहिलो एकदिवसीय खेलमा न्यूजील्याण्डलाई ४ विकेटले हरायो। आइतबार वडोदरामा न्यूजील्याण्डले ३०० रन बनाएको थियो। भारतले एकदिवसीय क्रिकेटमा २०औँ पटक ३०० भन्दा बढी रनको लक्ष्य सफलतापूर्वक पछ्यायो।
कोहलीले सबैभन्दा छिटो २८ हजार अन्तर्राष्ट्रिय रन पूरा गर्ने कीर्तिमान पनि बनाए। उनी अहिले अन्तर्राष्ट्रिय क्रिकेटका दोस्रो सर्वाधिक रन बनाउने खेलाडी बनेका छन्।
विराट कोहलीले एकदिवसीय क्रिकेटमा लगातार पाँचौँ पटक ५० भन्दा बढी रनको स्कोर गरेका छन्। अक्टोबरमा अस्ट्रेलियाविरुद्धको एकदिवसीय सिरिजका पहिलो दुई खेलमा उनी खाता खोल्न सकेनन्, तर तेस्रो खेलमा अर्धशतक बनाए। त्यसपछि दक्षिण अफ्रिकाविरुद्ध दुई शतक र एक अर्धशतक बनाए। अब न्यूजील्याण्डविरुद्ध ९३ रन बनाएर उनले लगातार पाँचौँ एकदिवसीय खेलमा ५०ं स्कोर पूरा गरेका छन्।
विराटले एकदिवसीय क्रिकेटमा पाँचौँ पटक लगातार पाँच इनिङ्समा ५० भन्दा बढी रन बनाउने उपलब्धि हासिल गरेका छन्। यो कीर्तिमानमा उनी शीर्ष स्थानमा छन्। उनका पछि दक्षिण अफ्रिकाका क्विन्टन डी कक, न्यूजील्याण्डका केन विलियम्सन र पाकिस्तानका बाबर आजमले दुई–दुई पटक यस्तो उपलब्धि हासिल गरेका छन्।
९३ रनको इनिङ्समा २५औँ रन बनाउनेबित्तिकै कोहलीले २८ हजार अन्तर्राष्ट्रिय रन पूरा गरे। यसका लागि उनले जम्मा ६२४ इनिङ्स मात्र खेले। सबैभन्दा कम इनिङ्समा यो कीर्तिमानमा पुग्ने खेलाडी उनी बने। यसअघि भारतकै सचिन तेन्दुलकरले ६४४ इनिङ्समा २८ हजार रन पूरा गरेका थिए।
त्यस्तै, इनिङ्समा ४२औँ रन बनाउनेबित्तिकै विराट अन्तर्राष्ट्रिय क्रिकेटका दोस्रो सर्वाधिक रन बनाउने खेलाडी बने। उनले श्रीलंकाका कुमार संगकाराको २८,०१६ रनको कीर्तिमान तोडे। कोहलीका हाल २८,०६८ रन पुगेका छन्। भारतकै सचिन तेन्दुलकर ३४,३५७ रनसहित शीर्ष स्थानमा छन्।
