एजेन्सी । टी–२० विश्वकप २०२६ को सुपर–८ टोलीको टुङ्गो लागिसकेको छ । २० टिमको सहभागिता रहेको प्रतियोगितामा ५/५ टोलीलाई ४ फरक समूहमा विभाजन गरिएको थियो । ३६ खेल सकिएपछि मात्रै अर्को चरणका लागि ८ टोलीको टुंगो लागेको थियो ।
सुपर–८ मा भारत र पाकिस्तान समूह ‘ए’ बाट छनोट भएका छन् । समूह बी मा रहेको श्रीलंका र जिम्बाब्वे छनोट भएका छन् भने समूह ‘सी’ बाट इंग्ल्याण्ड र वेस्ट इन्डिज रसमूह ‘डी’ बाट न्युजिल्यान्ड र दक्षिण अफ्रिका सुपर–८ मा प्रवेश गरेका छन् ।
सुपर ८ अन्तर्गत ३ दिन डबल हेडर हुने
सुपर–८ चरणमा आठ टोलीलाई २ समूहमा विभाजित गरिएको छ । प्रत्येक टोलीले आफ्नो समूहमा एक अर्कासँग ३–३ खेल खेल्नेछन् । दुवै समूहका शीर्ष २ टोलीले अर्को चरणमा प्रवेश गर्नेछन् । सुपर–८ चरणमा २२ र २६ फेब्रुअरी र मार्च १ मा २–२ खेल हुनेछन् भने बाँकी दिनहरूमा १–१ खेल मात्र हुनेछ।
प्रतियोगिताको सुपर ८ चरणको खेल २१ फेब्रुअरीबाट सुरु हुनेछ । पहिलो खेल न्युजिल्यान्ड र पाकिस्तानबीच हुनेछ ।
प्रतियोगीताको पहिलो सेमिफाइनल मार्च ४ मा हुनेछ भने दोस्रो सेमिफाइनल मार्च ५ मा वानखेडे रंगशालामा हुनेछ । यी जित्ने टोलीले मार्च ८ मा फाइनलमा प्रतिस्पर्धा गर्नेछ। फाईनल खेलको लागि रंगशाला छनौट गरिएको छैन । पाकिस्तान नकआउट राउण्डमा प्रवेश गरेमा सबै खेल कोलम्बोमा हुनेछन् ।
प्रतियोगितामा २० टोलीबाट अष्ट्रेलिया, आयरल्याण्ड, ओमान, स्कटल्याण्ड, इटाली, नेपाल, अफगानिस्तान, युएई, नामिबिया, अमेरिका, नेदरल्याण्ड र क्यानडा लिग चरणबाट बाहिरिसकेका छन् ।
