शिबरन हिटमायर र रोभमन पावेलको बिस्फोटक ब्याटिङ मद्दतले आइसिसि टी २० विश्वकपको सुपर ८ को खेलमा जिम्बाबे १०७ रनको फराकिलो अन्तरले पराजित भएको छ ।
यो जितसँगै सुपर ८ को समूह १ मा वेस्ट इन्डिज २ अंक सहित रन रेट (५.३८) का आधारमा पहिलो स्थानमा उक्लेको छ । यही समूहमा रहेको दक्षिण अफ्रिका पनि राम्रो रन रेट (३.८) का साथ दोस्रो स्थानमा छ । अफ्रिकाले आयोजक भारतलाई विशाल रन अन्तरले हराएको थियो ।
यही समूहमा रहेका भारत र जिम्बाबेलाई क्वार्टरफाइनलमा पुग्न अब ठूलै संकट देखिएको छ । किनभने वेस्ट इन्डिज र अफ्रिकाको रनरेट निकै बढी छ । अबका खेलमा यी दुई टिमले जितेर मात्र पुग्दैन, उच्च रन रेटका आधारमा जित्नु पर्ने हुन्छ, जुन लगभग असम्भब छ ।
सोमबार मुम्बईको वान्खेडे मैदानमा जिम्बाबेले टस जितेर वेस्ट इन्डिजलाई ब्याटिङको निम्तो दिएको थियो ।
पावर हिटिङका लागि नाम कमाएको वेस्ट इन्डिजका लागि शिबरन हिटमायरले ३४ बलको सामना गर्दै ८४ रनको आकर्षक पारि खेले । दुई पटक जीवनदान पाएका हिटमायरले ७ छक्का र ७ चौका हिर्काएका थिए ।
अर्कातिर रोभमन पावेलले पनि ५९ रन बनाए । उनले ४ चौका र ४ छक्का प्रहार गरेका थिए ।
प्रारम्भिक ब्याटर ब्रान्डोन किङ (९) र कप्तान शाई होप (१४) सस्तैमा पभेलियन फर्के पनि निर्धारित २० ओभरको खेलमा वेस्ट इन्डिजले ६ विकेट गुमाएर २५४ रन बनाएको थियो । यस इनिङमा १९ वटा छक्का प्रहार भएका थिए भने १६ वटा चौका ।
जितका लागि २५५ रनको विशाल लक्ष पछ्याएको जिम्बाबे १७.४ ओभरमा अलआउट हुँदै १४७ रनमा समेटिएको थियो । जिम्बाबेका लागि ब्राड इभान्सले ४३ तथा डियोन मायर्सले २८ र कप्तान सिकन्दर राजाले २७ रन बनाएका थिए । अन्य खेलाडी सस्तैमा पभेलियन फर्के ।
वेस्ट इन्डिजका लागि गुडाकेस मोटीले ४, अकिले हुसेनले ३, म्याथ्यु फोर्डले २ तथा जेसन होल्डरले १ विकेट लिए ।
मंगलबारको खेल
इङल्यान्ड VS पाकिस्तान (७.१५ बजे)
अंक तालिका
