काठमाडौं । नेपाली कांग्रेस केन्द्रीय समितिको आज बस्ने भनिएको बैठकपनि स्थगित भएको छ । भ्रातृ संगठन नेविसंघको नेतृत्वका सम्बन्धमा सहमति जुट्न नसकेपछि केन्द्रीय समितिको बैठक स्थगित भएको हो ।
शुत्र्रबार अपरान्ह १ बजेका लागि बोलाईएको केन्द्रीय समिति बैठक नेविसंघ नेतृत्वमा संस्थापन र असन्तुष्ट पक्ष आआफ्नै अडानमा कायम रहदाँ केन्द्रिय समितीको बैठक स्थगित हुने भएको छ । मूख्य विषयमा सहमती जुटी नसकेकाले आजको बैठकमा पनि आफूहरु सहभागि नहुने वरिष्ठ नेता रामचन्द्र पौडेल पक्षका वार्ता टोली सदस्य हृदयराम थानीले जानकारी दिए ।
यसअघि बिहिबार साँझ चाक्सिबारीमा संस्थापन पक्षबाट उपसभापति विमलेन्द्र निधि तथा पौडेल पक्षबाट पुर्वमहामन्त्री प्रकाशमान सिंह र केन्द्रीय सदस्यहरु दिलेन्द्र प्रसाद बडु र हृदयराम थानी रहेको वार्ता टोलीवीच सहमती जुट्न सकेन ।
हिजोको छलफलमा सहमती जुट्न नसकेपछि दुवै वार्ता टोलीका सदस्यहरु आ आफ्ना समूहका शिर्ष नेतासँग कुरा गर्ने भन्दै छुट्टिए । अहिले केहीबेरमा पौडेल पक्षका केन्द्रीय सदस्यहरुको बैठक चाक्सिबारीमा बस्दैछ । महाधिवेशनको विस्तृत कार्यतालिका, विभाग गठन तथा भ्रातृ संगठनको नेतृत्व लगायतका विषयमा सहमती जुट्न नसक्दा मंसिर २६ गतेदेखि शुरु भएको प्रमुख प्रतिपक्षी दल नेपाली कांग्रेसको केन्द्रीय समिति बैठक अहिलेसम्म एजेण्डामा प्रवेश नै नगरी स्थगित गरिंदै आएको छ ।
