काठमाडौं । अवैध रूपमा अन्तरदेशीय रकम कारोबार (हुन्डी) मा संलग्न रहेको आशंकामा काठमाडौं प्रहरीले एक चिनियाँ नागरिकलाई पक्राउ गरेको छ।
काठमाडौं उपत्यका अपराध अनुसन्धान कार्यालय, टेकुबाट विशेष सूचनाका आधारमा खटिएको प्रहरी टोलीले काठमाडौं महानगरपालिका–२७ ठमेल क्षेत्रबाट ४३ वर्षीय टान झियाङलाई पक्राउ गरेको हो। उनी होटल व्यवसाय सञ्चालन गर्दै बस्दै आएका छन् ।
प्रहरीका अनुसार उनको साथबाट स्रोत नखुलेको नेपाली नगद १० लाख रुपैयाँ बरामद गरिएको छ। पक्राउ परेका उनलाई थप अनुसन्धान तथा आवश्यक कारबाहीका लागि जिल्ला प्रहरी परिसर काठमाडौं पठाइएको छ।
प्रहरीले घटनाबारे विस्तृत अनुसन्धान भइरहेको जनाएको छ।
