काठमाडाैँ । सवारी दुर्घटना न्यूनीकरण गर्ने उद्देश्यले गरिएको चेकजाँचका क्रममा स्याङ्जामा लागूऔषध सेवन गरी सवारी साधन चलाउने ४ जना चालकलाई प्रहरीले नियन्त्रणमा लिएको छ।
जिल्ला प्रहरी कार्यालय स्याङ्जा र जिल्ला ट्राफिक प्रहरी कार्यालयको संयुक्त टोलीले आइतबार दिउँसो करिब २:५० बजे पुतलीबजार नगरपालिका–१ स्थित सिद्धार्थ राजमार्गको बसपार्क क्षेत्रमा सवारी चालकहरूको परीक्षण गर्दा उनीहरू लागूऔषध सेवन गरेको अवस्थामा फेला परेका हुन्।
प्रहरीका अनुसार नियन्त्रणमा लिइएकामध्ये तनहुँ भिमाद नगरपालिका–२ का २७ वर्षीय मोहन थापाको साथबाट ५ ग्राम गाँजा बरामद भएको छ। त्यस्तै पाल्पा तानसेन नगरपालिका–२ का २० वर्षीय विपिन कुँवरको साथबाट पनि ५ ग्राम गाँजा फेला परेको प्रहरीले जनाएको छ।
यसैगरी स्याङ्जा भिरकोट नगरपालिका–१ का २० वर्षीय प्रमिस के.सी. र कास्की पोखरा महानगरपालिका–११ का ४३ वर्षीय रिकेश परियार पनि लागूऔषध सेवन गरी सवारी चलाएको अवस्थामा नियन्त्रणमा परेका छन्।
प्रहरीले उनीहरूलाई नियन्त्रणमा लिएर थप अनुसन्धान तथा कानुनी प्रक्रिया अघि बढाइएको जनाएको छ।
