काठमाडौं । उपप्रधान, कानुन तथा संसदीय मामिला मन्त्री उपेन्द्र यादवले मन्त्रिमण्डल पुनर्गठन गर्ने अधिकार प्रधानमन्त्री केपी शर्मा ओलीलाई भएको बताएका छन् । सोमबार दिउँसो सिंहदरबारस्थित मन्त्रालय पुगेर कार्यभार सम्हालेका यादवले कानुन मन्त्रालयको जिम्मेवारीले आफूलाई थप अनुभवी बनाउने बताएका हुन् ।
‘प्रधानमन्त्रीले सबैतिर अनुभव होस् भनेर मलाई स्वास्थ्यबाट कानुन मन्त्रालय पठाउनुभएको हुनुपर्छ,’ यादवले पत्रकारहरूसँग मन्त्रालयमा भने, ‘सरकार छाड्ने निर्णयमा पार्टी पुगेको छैन। अहिले किन छाड्ने सरकार ?’
यादवले संविधान संशोधन राजनीतिक कुरा भएको बताए।
‘अब संविधान संशोधन गर्ने बेला भएको छ,’ उनले भने, ‘प्रधानमन्त्रीले अली बढी नै माया गरेर हुनुपर्छ कानुन मन्त्रालय पठाउनुभयो।’ मन्त्रालय हेरफेर गर्ने अधिकार पनि प्रधानमन्त्रीलाई भएकोले मन्त्रीसँग खासै परामर्श गरिराख्नु नपर्ने उनले बताए।
प्रधानमन्त्रीले मन्त्रिमण्डल पुनर्गठन गर्दै यादवलाई स्वास्थ्य तथा जनसंख्या मन्त्रालयबाट जिम्मेवारी हेरफेर गरी कानुन मन्त्रालयमा पुर्याउदा यादव भारतमा थिए।
