काठमाडौं । आईएमई लाइफ इन्स्योरेन्स कम्पनी लिमिटेडले संस्थागत सामाजिक उत्तरदायित्व (CSR) अन्तर्गत आर्थिक अभावका कारण उपचारबाट वञ्चित १०० जना मोतीबिन्दुका बिरामीको निःशुल्क शल्यक्रियाका लागि आर्थिक सहयोग गरेको छ ।
कम्पनीले माट्रिका आइ सेन्टरसँग सहकार्य गर्दै जनकपुरमा आयोजना हुने मोतीबिन्दु शल्यक्रिया कार्यक्रमका लागि रु. ६ लाख आर्थिक सहयोग प्रदान गरेको हो । उक्त सहयोगबाट धनुषा र महोत्तरी जिल्लाका ग्रामीण क्षेत्रका १०० जना मोतीबिन्दु पीडित नागरिक प्रत्यक्ष लाभान्वित हुने अपेक्षा गरिएको छ ।
माट्रिका आइ सेन्टरले विगतदेखि नै देशका विभिन्न जिल्लामा आँखा स्वास्थ्य सेवा, मोतीबिन्दु पहिचान तथा शल्यक्रिया कार्यक्रम सञ्चालन गर्दै आएको छ । सेन्टरको विशेषज्ञता र आईएमई लाइफ इन्स्योरेन्सको सामाजिक प्रतिबद्धताबीचको सहकार्यले ग्रामीण समुदायमा सकारात्मक प्रभाव पार्ने विश्वास गरिएको छ ।
आईएमई लाइफ इन्स्योरेन्सका उप–कार्यकारी प्रमुख खिलेन्द्र पौडेलले कम्पनीले स्वास्थ्य, शिक्षा तथा समुदाय विकासका क्षेत्रमा सामाजिक उत्तरदायित्वअन्तर्गत निरन्तर योगदान गर्दै आएको बताउनुभयो । उहाँले आर्थिक अभावका कारण दृष्टि उपचारबाट वञ्चित नागरिकलाई यस कार्यक्रमले नयाँ आशा प्रदान गर्ने विश्वास व्यक्त गर्नुभयो ।
त्यस्तै, माट्रिका आइ सेन्टरका अध्यक्ष सूरज श्रेष्ठले आईएमई लाइफ इन्स्योरेन्सको सहयोगप्रति धन्यवाद व्यक्त गर्दै यस कार्यक्रमले ग्रामीण क्षेत्रका विपन्न परिवारको जीवनमा सकारात्मक परिवर्तन ल्याउने बताउनुभयो ।
आईएमई लाइफ इन्स्योरेन्सले आफ्नो सामाजिक उत्तरदायित्वका कार्यक्रममार्फत शिक्षा, स्वास्थ्य, वातावरण संरक्षण, वित्तीय साक्षरता तथा समुदाय उत्थानका क्षेत्रमा निरन्तर योगदान गर्दै आएको जनाएको छ ।
