काठमाडाैँ । नेपाल कम्युनिस्ट पार्टीका प्रमुख सचेतक युवराज दुलालले सरकारका पछिल्ला गतिविधि, मन्त्रीहरूका अभिव्यक्ति र कार्यशैलीप्रति आपत्ति जनाउनुभएको छ ।
सोमवार संसद भवन बाहिर सञ्चारकर्मीहरूसँग कुरा गर्दै उहाँले सरकारले विधिको शासन र मानवीयतालाई उपेक्षा गरेको आरोप लगाउनुभएको हो ।
पूर्वाधार विकासमन्त्री सुनिल लम्सालले सडक निर्माण नगर्ने व्यवसायीको खुट्टा भाँचिदिने भनी दिनुभएको अभिव्यक्तिको सन्दर्भमा बोल्दै दुलालले सो कुरा गैरकानूनी र अशोभनीय भएको बताउनु भयो ।
प्रधानमन्त्रीले सामाजिक सञ्जालमा दुई जना मन्त्रीसहितको फोटो सार्वजनिक गर्दै देश बनाउने टोली भनी उल्लेख गरेको विषयमा टिप्पणी गर्दै दुलालले देश तीन जनाले मात्र नभई समग्र मन्त्रिपरिषद्को नेतृत्वमा बन्ने बताउनु भयो । उहाँले प्रधानमन्त्री जस्तो जिम्मेवार पदमा बसेको व्यक्तिले यस्ता गम्भीर विषयलाई ठट्टाको रूपमा लिनु उपयुक्त नभएको जिकिर गर्नुभयो ।
अर्थमन्त्रीको विषयमा बोल्दै प्रमुख सचेतक दुलालले बजेट निर्माणमा करका दरहरू हेरफेर भएको कुरा अर्थमन्त्रीले घुमाउरो पाराले स्वीकार गरिसकेको दाबी गर्नुभयो । उहाँले यसअघि साना कुरामा पनि संसदीय छानबिनको माग गर्नेहरू अहिले गम्भीर विषयमा छानबिन गर्न डराएको भन्दै आलोचना गर्नुभयो ।
यसैगरी, सीमा क्षेत्रमा भइरहेका समस्या र सुस्ता लगायतका क्षेत्रमा नागरिकले भोग्नुपरेको पीडाप्रति सरकार संवेदनशील हुनुपर्ने उहाँको भनाइ थियो । प्रधानमन्त्रीका कतिपय हलुका अभिव्यक्तिले सीमा क्षेत्रका नागरिकमा आक्रोश पैदा गरेको र यसले दीर्घकालीन असर पार्ने उहाँले उल्लेख गर्नुभयो । संसदीय अभ्यासका सम्बन्धमा चर्चा गर्दै दुलालले सत्ता पक्षले प्रतिपक्षका जायज मागलाई पनि सम्बोधन नगर्ने गलत परम्परा बसेको बताउनु भयो ।
