काठमाडौं । राष्ट्रिय स्वतन्त्र पार्टी (रास्वपा)को महिला उपसभापति पदका लागि सोबिता गौतम र तोसिमा कार्कीबीच प्रत्यक्ष प्रतिस्पर्धा हुने भएको छ।
पार्टीको केन्द्रीय निर्वाचन आयोगले शुक्रबार बिहान सार्वजनिक गरेको पदाधिकारी उम्मेदवारको प्रारम्भिक नामावलीअनुसार दुवैले आफ्नो उम्मेदवारी कायम राखेका छन्। महिला उपसभापति पदमा अन्य केही नेताको नाम चर्चामा रहे पनि उनीहरूले उम्मेदवारी दर्ता नगरेपछि प्रतिस्पर्धा सोबिता र तोसिमाबीच सीमित भएको हो।
हालै सम्पन्न केन्द्रीय सदस्य निर्वाचनमा सोबिता गौतमले २ हजार ६४१ मत प्राप्त गर्दै स्वर्णिम वाग्लेपछि दोस्रो सर्वाधिक मत ल्याएकी थिइन्। तोसिमा कार्कीले २ हजार ३०२ मत प्राप्त गरेकी थिइन्।
रास्वपाको संशोधित विधानअनुसार पार्टीमा १९ सदस्यीय पदाधिकारी रहने व्यवस्था छ। तीमध्ये सभापतिसहित सात पद निर्वाचित हुनेछन् भने बाँकी १२ पद मनोनयनमार्फत पूर्ति गरिनेछ।
सभापतिमा रवि लामिछाने निर्विरोध निर्वाचित भइसकेका छन्। अब उपसभापति (खुला), महिला उपसभापति, महामन्त्री (खुला), दुई सहमहामन्त्री (खुला) र एक महिला सहमहामन्त्री गरी बाँकी ६ पदका लागि मतदान हुनेछ।
