काठमाडौं । त्रिपुरेश्वरस्थित राहदानी विभागको तीन नम्बर गेटमा आत्मदाह प्रयास गरेका २५ वर्षीय गणेश नेपालीको स्वास्थ्य अवस्था गम्भीर रहेको छ। उनको हाल वीर अस्पतालमा उपचार भइरहेको छ।
उपचारमा संलग्न चिकित्सक डा. पीयूष दाहालका अनुसार शरीरको करिब ६० प्रतिशत भाग जलेको प्रारम्भिक अनुमान गरिएको छ। अनुहार, घाँटी, छाती तथा दुवै हातखुट्टाका केही भागमा गम्भीर जलन भएकाले उनलाई सघन उपचार कक्ष (आईसीयू) मा राख्ने तयारी भइरहेको छ।
अस्पतालले आकस्मिक कक्षमै आवश्यक प्राथमिक उपचार, औषधि तथा परीक्षणको प्रक्रिया पूरा गरिरहेको छ। एनेस्थेसिया टोलीसँग समन्वय गरी बिरामीलाई आईसीयूमा सार्ने तयारी भइरहेको चिकित्सकहरूले बताएका छन्।
