काठमाडौँ । जनतालाई शान्ति र सुरक्षाको प्रत्याभूति गर्न नसकेको भन्दै प्रतिनिधिसभाको बैठकमा सरकारको कडा आलोचना भएको छ ।
प्रतिनिधिसभामा आफ्नो धारणा राख्ने क्रममा अधिकांश सांसदहरुले सरकारको सुरक्षा व्यवस्थाबारे प्रश्न उठाएका हुन् ।
सांसदहरुले सरकारलाई निषेधभन्दा पनि वार्ता र संवादको माध्यमबाट समस्या समाधान गर्न सुझाव दिएका छन् भने नेत्र विक्रम चन्द विप्लव समूहलाई पनि हिंसाको बाटो त्यागेर शान्तिको बाटो अवलम्बन गर्न आग्रह गरेका छन् ।
सांसद शान्ता चौधरीले अपराधिक संस्कृतिले जनतलाई त्रसित भएको बताइन् । उनले बम आतंकको भत्सर्ना गर्दै विप्लव समूहलाई आतंक होइन सहकार्यको लागि आग्रह गरिन् ।
‘जनताले रगत होइन विकास मागेको छ । आतंक होइन उज्यालो बाँड्नु छ,’ उनले भनिन्, ‘गोल बमबारुदको आतंक बन्द गर्न आग्रह गर्छु । साथै सरकारले पनि उचित कदम चालोस् ।’
सांसद सुजाता परियारले सुरक्षा व्यवस्था कडा छ भनेर सरकारले झुटो आश्वासन मात्र दिएको आरोप लगाइन् । ‘गृहप्रशासन के हेरेर बसिरहेको छ ?,’ उनले भनिन् ।
त्यस्तै, सांसद हिरा गुरुङले बम काण्ड मच्चिरहँदा ‘यही हो समृद्ध नेपाल सुखी नेपाली ?’ भनेर प्रश्न गरिन् ।
त्यस्तै, सांसद लालकाजी गुरुङले काठमाडौँमा बम विस्फोटका घटनामा जनताले ज्यान गुमाउनु परिरहेको बेला सरकार के हेरेर बसेको छ भन्दै प्रश्न गरे । सरकारले निषेध गर्न खोज्दा यो समस्या उत्पन्न भएको जिकिर थियो । ‘दुई तिहाईको दम्भ देखाउने भन्दा पनि वार्ता र संवादबाट समस्या गर्नुपर्छ,’ उनले पर्छ ।
सांसद सीता देवी यादवले दुई तिहाईको कम्युष्टि सरकार अर्धनिन्द्रा रहेको भन्दै शान्तिको सुरक्षा दिन नसक्ने सरकारसँग के आशा गर्नु ? भन्दै सरकारको आलोचना गरिन् ।
