काटमाडौँ । विश्वकप विजेता फ्रान्सले युरो कप छनोट २०२० छनोटमा आइसल्यान्डलाई सजिलै ४-० ले हराएको छ ।
सोमबार राति आफ्नै घरेलु मैदानमा भएको खेलमा फ्रान्सको लागि सामुएल उम्टिटी, ओलिभर जिरुड, केलियन एमबाप्पे र एन्टोनी ग्रीजम्यानले समान १–१ गोल गरे ।
फ्रान्सका लागि १२औं उम्टिटीले पहिलो गोल गरे । उनले एमबाप्पेको पासमा गोल गरेका थिए । पहिलो हाफ १–० ले अगाडि रहेको फ्रान्सले दोस्रो हाफमा ३ गोल गर्यो ।
खेलको ६८औं मिनेटमा जिरुडले बेन्जामिन पाभार्डको पासमा गोल गरे । फेरि ७८औं मिनेटमा एमबाप्पेले गोल गरे भने ८४औं मिनेटमा ग्रीजम्यानले गोल गरेर खेल ४–० ले जिताए ।
यो जितले छनोटको समूह एच मा आफूलाई बलियो बनाएको छ । फ्रान्सको यो लगातार दोस्रो जित हो ।
