एजेन्सी । आईपीएलको पहिलो खेलमा जितसँगै सुरुवात गरेको कोलकाता नाइट राइडर्स (केकेआर) आज रोयल च्यालेन्जर्स बैंग्लोर (आरसीबी) विरुद्धको खेलमा आफ्नो स्थिति बलियो बनाउने लक्ष्यमा छ ।
श्रेयस अय्यरको नेतृत्वमा रहेको केकेआरले आफ्नो पहिलो खेलमा डिफेन्डिङ च्याम्पियन चेन्नई सुपर किंग्सलाई ६ विकेटले हराएको थियो भने आरसीबीले पञ्जाब किंग्ससँग २०० रन बनाएर पनि पाँच विकेटको हार बेहोरेको थियो ।
दुई टोलीबीच हालसम्म जम्मा ३० खेल भएका छन् । जसमध्ये कोलकाताले १७ र बैंगलोरले १३ खेल जितेको छ । दुई टोलीबीचको पछिल्लो १० खेलमा कोलकाताले ६ र बैंगलोरले चार जित निकालेको छ । कोलकाताको टोली बैंग्लोरविरुद्ध जितको ह्याट्रिक गर्न चाहन्छ । गत सिजन, केकेआर र आरसीबीले तीन पटक भेट गरेका थिए । पहिलो खेलमा कोहलीको टिम विजयी भएको थियो । त्यसपछि कोलकाताले दोस्रो खेल र प्लेअफमा बैंगलोरलाई पराजित गरेको थियो ।
आरसीबीका कप्तान फाफ डु प्लेसिस उत्कृष्ट लयमा छन् । उनले पहिलो खेलमा ५७ बलमा ८८ रन बनाउँदै आफ्नो फर्मलाई कायम राख्न प्रयास गर्नेछन् । यद्यपि, ओपनर अनुज रावतले राम्रो सुरुवातको फाइदा उठाउन सकेनन् तर आफ्नो प्रदर्शनमा निरन्तरता ल्याउन उनी चाहन्छन् । कप्तानको दबाबबाट मुक्त भएपछि विराट कोहलीले फर्ममा फर्किने संकेत दिएका छन् र कोलकाताविरुद्ध सबैको नजर कोहलीमा पर्नेछ । यदि आरसीबीले जित दर्ता गर्न चाहन्छ भने विकेटकिपर दिनेश कार्तिकले पनि अघिल्लो खेल जस्तै यस खेलेमा पनि राम्रो प्रदर्शन गर्नुपर्ने हुन्छ ।
केकेआरका बलरले फाफको छक्का प्रहार गर्ने क्षमताबाट विशेष सजग रहनुपर्नेछ भने आरसीबीका बलरहरूले पञ्जाबविरुद्धको कमजोरीलाई पनि बिर्सनुपर्नेछ। मोहम्मद सिराजले पछिल्लो खेलमा ५९ रन दिएका थिए । उनले छिट्टै आफ्नो खेलमा सुधार गर्नुपर्छ । यस्तै, डेथ ओभर विशेषज्ञ बलर हर्षल पटेलको भूमिका पनि महत्वपूर्ण हुनेछ । मध्य ओभरमा श्रीलंकाका स्पिनर हसरंगाको भूमिका पनि उत्तिकै महत्वपूर्ण हुनेछ ।
अर्कोतर्फ केकेआरले पहिलो खेलमा सबै क्षेत्रले राम्रो प्रदर्शन गरेको थियो र उनीहरू त्यही दोहोर्याउन चाहन्छन् । केकेआरका लागि सबैभन्दा ठूलो सकारात्मक पक्ष अजिंक्य रहाणे फर्ममा फर्किनु हो । अलराउन्डर भेंकटेश अय्यरले पहिलो खेलमा १६ रन मात्र बनाउन सके पनि बलिङ आक्रमणलाई ध्वस्त पार्न सक्छन् । मध्यक्रममा कप्तान श्रेयस अय्यर, साम बिलिङ्स र शेल्डन ज्याक्सनले जिम्मेवारी लिनुपर्नेछ ।
बलिङमा उमेश यादवले अन्तिम खेलमा उत्कृष्ट खेलेका थिए । तर, शिवम मावी, स्पिनर वरुण चक्रवर्ती र सुनिल नारायण लगायत अन्यले आफ्नो प्रदर्शन सुधार्नुपर्ने हुन्छ । ब्याट र बलमा अलराउन्डर आन्द्रे रसेलको भूमिकाले दुई टोलीबीचको खेललाई फरक पार्न सक्छ ।
खेल समयः ७ः४५ बजे
रोयल च्यालेन्जर्स बैंगलोरको सम्भावित प्लेइङ–११
फाफ डु प्लेसिस (कप्तान), अनुज रावत, विराट कोहली, शेरफान रदरफोर्ड, शाहबाज अहमद/महिपाल लोमरोर, दिनेश कार्तिक (विकेटकीपर), हर्षल पटेल, वानिन्दु हसरांगा, डेभिड विली, आकाश दीप, मोहम्मद सिराज ।
कोलकाता नाइट राइडर्सको सम्भावित प्लेइङ–११
वेंकटेश अय्यर, अजिंक्य रहाणे, श्रेयस अय्यर (कप्तान), नितिश राणा, साम बिलिङ्स, आन्द्रे रसेल, सुनील नारायण, शेल्डन ज्याक्सन (विकेटकीपर), उमेश यादव, शिवम मावी, वरुण चक्रवर्ती।
