काठमाडौं: एसियाली खेल अन्तर्गत चीनको हाङझाउमा जारी एसियाड क्रिकेटको फाइनलमा भारत र अफगानिस्तान प्रवेश गरेका छन् ।
आज सम्पन्न दुई सेमिफाइनल खेलमा भारतले बंगलादेशलाई र अफगानिस्तानले पाकिस्तानलाई पराजित गरेका थिए ।
नवप्रवेशी अफगानिस्तानले पाकिस्तानलाई २० ओभरको खेलमा ४ विकेटले पराजित गरेको थियो । पाकिस्तानले प्रस्तुत गरेको ११६ रनको लक्ष अफगानिस्तानले १७.५ ओभरमा ६ विकेट गुमाएर प्राप्त गरेको थियो ।
अफगानिस्तानका गुलबादिन नाइबले १९ बलमा २६ रन बनाउँदै टिमलाई फाइनलमा पुर्याएका थिए ।
यसअघि पहिले ब्याटिङ गरेको पाकिस्तानको टिम १८ ओभरमा अलआउट हुँदै ११५ रनमा समेटिएको थियो । पाकिस्तानका लागि ओमार युसुफले सर्वाधिक २४ रनको योगदान गरेका थिए ।
अफगान बलरहरु गुलबादिन नाइबले १, फरीद अहमदले ३, क्वाइस अहमदले २, जहिर खाँले २ तथा करिम जनतले १ विकेट लिएका थिए ।
भारत–बंगलादेश
यस्तै भारत र बंगलादेश बीचको निरश खेलमा भारत विजयी भयो ।
टस हारेर पहिले ब्याटिङको निम्तो पाएको बंगलादेशले ९ विकेटको क्षतिमा ९६ रन मात्र बनाएको थियो । बंगलादेशलाई सस्तैमा आउट गर्नेक्रममा भारतीय बलर साई किशोरले ३, वासिङटन सुन्दरले २, अर्सदिप सिंह, तिलक बर्मा, रवी बिस्नोई र शहबाज अहमदले समान एकएक विकेट लिएका थिए ।
जितका लागि ९७ रनको चुनौती पाएको भारतले एक विकेटको क्षतिमा ९.२ ओभरमै लक्ष प्राप्त गरेको थियो । भारतका लागि कप्तान रुतुराज गायकवाडले ४० तथा तिलक बर्माले ५५ रन बनाएका थिए ।
भारतले एकमात्र विकेट यशस्वी जयसवालको गुमाएको थियो । उनी शून्यमै आउट भएका थिए ।
