एजेन्सी । १९ औँ एसियाली खेलकुद प्रतियोगिताको पुरुष क्रिकेट प्रतियोगिताको फाइनल आज भारत र अफगानिस्तानबीच हुँदैछ ।
यो खेल सिचाङ युनिभर्सिटी अफ टेक्नोलोजीको पिङफेङ मैदानमा बिहान ११ः४५ बजेदेखि हुनेछ । यद्यपि, यो खेलमा वर्षाको सम्भावना ६० प्रतिशत रहेको छ ।
सेमिफाइनलमा भारतले बंगलादेशलाई तथा अफगानिस्तानले पाकिस्तानलाई हराउँदै फाइनलमा स्थान बनाएका हुन् ।
भारतले यो उपाधि खेल जित्यो भने उसले एसियाडको पुरुष क्रिकेट प्रतियोगिताको पहिलो स्वर्ण जित्नेछ । भारतीय पुरुष क्रिकेट टोली पहिलो पटक एसियाली खेलकुदमा सहभागी हुँदैछ । केही दिनअघि भारतीय महिला क्रिकेट टोलीले स्वर्ण जितेको थियो ।
हेड टु हेडमा भारतको जीत रेकर्ड १०० प्रतिशत
भारतको टी–२० हेड टु हेड उत्कृष्ट छ । अफगानिस्तानविरुद्ध भारतको जितको रेकर्ड शतप्रतिशत छ । दुवै टोलीले अहिलेसम्म ४ वटा टी–२० खेल खेलेका छन् र ती सबै भारतीय टोलीले जितेको छ ।
भारतीय टोलीका यशस्वी जैसवाल र रवि बिश्नोई एसियाडमा लयमा देखिन्छन् । यशस्वीले प्रतियोगिताको दुई खेलमा शतक सहित १०० रन बनाएका थिए । दोस्रो खेलमा उनले खाता खोल्न सकेनन् । अर्कोतर्फ लेग स्पिनर रवि बिश्नोईले दुई खेलमा चार विकेट लिएका छन् ।
अफगानिस्तानका लागि नूर अली जद्रानले दुई खेलमा १०५.८८ को स्ट्राइक रेटमा ९० रन बनाएका छन् । बलिङमा क्यास अहमदले दुई खेलमा ५ विकेट लिएका छन् । उनी ३.८५ को इकोनोमीमा बलिङ गरिरहेका छन् ।
दुबै टोलीको सम्भावित प्लेइङ–११
भारतः ऋतुराज गायकवाड (कप्तान), यशस्वी जैसवाल, तिलक वर्मा, जितेश शर्मा, रिंकु सिंह, शिवम दुबे, वाशिंगटन सुन्दर, आर साई किशोर, रवि बिश्नोई, अर्शदीप सिंह र आवेश खान ।
अफगानिस्तानः गुलबदिन नाइब (कप्तान), मोहम्मद शहजाद, सेदिकल्लाह अटल, नूर अली जद्रान, साहिदुल्लाह कमाल, अफसर जजाई, करिम जनात, शराफुद्दीन अशरफ, कैस अहमद, फरीद अहम र जहीर खान ।
