काठमाडौं । महानगरीय अपराध महाशाखाले किर्ते कागजातहरु बनाएर ठगी गरेको आरोपमा एक भारतीय नागरिकलाई पक्राउ गरेको छ ।
पक्राउ पर्नेमा भारतको तामिलनाडु राज्यस्थित चेन्नई घर भएका ४४ वर्षीय शिवम विरुमुथु चेटियार रहेका छन् ।
महाशाखाका अनुसार चेटियारले मणिपाल अस्पताल खरिद गर्ने भारतीय सेयरहोल्डरहरुसँग सम्झौता गर्र्न लागेको भन्दै किर्ते कागजात देखाएर विभिन्न्न व्यक्तिलाई ठगी गरेका थिए भने प्रलोभनमा पारेका व्यक्तिहरुको जमिनको लालपूर्जा उनले कब्जा गरेका थिए ।
महाशाखाबाट खटिएको विशेष टोलीले चेटियारलाई बालुवाटारबाट मंगलबार पक्राउ गरेको थियो । प्रारम्भिक अनुसन्धानको क्रममा उनले विभिन्न व्यक्तिबाट पटक–पटक गरी ५० लाख रुपैयाँ ठगी गरेको खुलेको छ भने उनीमाथि आवश्यक कार्वाहीका लागि महानगरीय प्रहरी परिसर, टेकु काठमाडौं पठाइएको महाशाखाले जनाएको छ ।
