चितवन । भरतपुर महानगरपालिकाको प्रमुखमा स्वतन्त्र उम्मेदवारी दिएका कांग्रेस नेता जगन्नाथ पौडेलले आफ्नो उम्मेदवारी फिर्ता लिएनन् ।
निर्वाचन आयोगले उम्मेदवारी फिर्ता लिनका लागि आज ५ बजेसम्म .समय निर्धारण गरेको थियो । निर्धारित समयसम्म पनि राष्ट्रियसभाका पूर्वसदस्य समेत रहेका पौडेलले उम्मेदवारी फिर्ता लिएनन् ।
कांग्रेसको निर्णय अनुसार नेकपा माओवादी केन्द्रलाई भरतपुरको मेयरमा सघाउने निर्णयको विरुद्धमा पौडेलले ‘बागी’ उम्मेदवारी दिएका थिए ।
कांग्रेसको विधान अनुसार अब पौडेलसहित प्रस्ताव र समर्थक पार्टीबाट स्वतः निष्कासित भएका छन् ।
कांग्रेस विधानको दफा ४ को १३ को ग अनुसार पौडेलसहित प्रस्तावक कृष्णलाल सापकोटा र समर्थक मीना खरेल कांग्रेसबाट स्वतः निष्कासित भएका हुन् ।
