काठमाडौं । इंग्ल्यान्डका अनुभवी खेलाडी रवि बोपारा नेपाल प्रिमियर लिग (एनपीएल)का लागि चितवन राइनोजमा अनुबन्ध भएका छन् ।
बोपाराले मंसिर १५ देखि सुरु हुने एनपीएलमा चितवन राइनोजबाट खेल्नेछन् । राइनोजले बोपारालाई विदेशी खेलाडीको कोटामा अनुबन्ध गरेको जनाएको छ ।
बोपारा चितवनमा अनुबन्धित हुने पाँचौ विदेशी खेलाडी हुन् । चितवनले यसअघि नै दक्षिण अफ्रिकाका मर्चेन्ट डे ल्याङ, इंग्ल्ल्याण्डका लुक बेन्केनस्टेइन, अफगानिस्तानका हसन एइसाखिल र नामिबियाका जान निकोल लोफ्टी–इटनलाई अनुबन्ध गरिसकेको छ ।
३९ वर्षीय भेट्रान ब्याटिङ अलराउण्डर बोपाराले इंग्ल्यान्डका लागि १३ टेष्ट, १२० ओडिआई र ३८ टी२०आई खेल खेलेका छन् । उनी ओपनिङ र मिडल अर्डर दुवै पोजिसनमा ब्याटिङ गर्न सक्षम खेलाडी हुन् ।
दायाँहाते ब्याट्सम्यानले आफ्नो करियरमा ४७८ टी२० खेलमा ९ हजार ४८६ रन बनाएका छन् भने २९१ विकेट पनि लिएका छन् ।
उनले इंग्ल्याण्डको राष्ट्रिय टिमबाहेक आईपीएल, बीबीएल, पिएसएल, सीपीएल, एलपीएललगायत विश्वका धेरै फ्रेन्चाइज टी२० लिग खेलेका छन् । भाइटालिटी टी२० ब्लास्ट र दी हन्ड्रेडमा गरी ५ हजार भन्दा बढी रन बनाएका छन् ।
युवा अलराउण्ड कुशल मल्ल मार्की प्लेयर रहेको चितवनमा भेट्रान खेलाडी सरद भेस्वाकर पनि छन् । यस्तै प्रशिक्षकमा उमेश पटवाल छन् । एनपीएल यही मंसिर १५ गतेदेखि काठमाडौंमा सुरु हुँदै छ ।
