पोखरा । राष्ट्रिय स्वतन्त्र पार्टी (रास्वपा)का सभापति रवि लामिछाने थप ५ दिन हिरासतमा रहने भएका छन् । जिल्ला अदालत कास्कीले पूर्व उपप्रधान तथा गृहमन्त्री लामिछानेलाई थप ५ दिन हिरासतमा राख्न अनुमति दिएको हो ।
बिहीबार न्यायाधीश चन्द्रकान्त पौडेलको इजलासले उनलाई ५ दिन हिरासतमा राख्न आदेश दिएको छ । यसअघि रविविरुद्ध ६ पटक हिरासत म्याद थप भइसकेको छ ।
लामिछानेविरुद्ध ५ वटा सहकारी ठगी, संगठित अपराध र सम्पत्ति शुद्धीकरणसम्बन्धी कसुरमा अनुसन्धान भइरहेको छ । उनी गत कार्तिक २ गते काठमाडौंबाट पक्राउ परेका हुन् ।
