काठमार्डां । नेपालको सिन्धुपाल्चोकको बाढीपहिरा पीडितलाई चीनले सहयोग गर्ने भएको छ। चीनको तिब्बत, न्यालम काउन्टीले २० टन चामल, दुई टन दाल, फेस मास्क १० हजार थान, सोलार लाइट र पाल दुईदुई सय थान तथा कम्बल पाँच सय थान दिने भएको छ।
सिन्धुपाल्चोक जिल्लालाई करोडौँको स्वास्थ्य सामग्री सहयोग गरेको भोलिपल्टै न्यालम काउन्टीले त्यहाँका बाढी पीडितलाई लक्षित गरी राहत सामग्री उपलब्ध गराउने बताएको हो। सो सहयोग सिन्धुपाल्चोक बाह्रबीसे नगरपालिका र भोटेकोशी गाउँपालिकाका बाढीपहिरा पीडितलाई दिइने प्रमुख जिल्ला अधिकारी उमेशकुमार ढकालले जानकारी दिनुभयो। उहाँकै विशेष पहलमा सो सामग्री दिन लागिएको हो।
भोटेकोशी र बाह्रबीसेमा बाढीपहिराबाट बाटो अवरुद्ध भएपछि केही हप्ता पहिले न्यालमका समकक्षीसँग ढकालले सहयोग गरिदिन अनुरोध गर्नु भएको थियो। केही दिनमा ती सामग्री आउने चिनियाँ पक्षबाट थाहा भएको छ। यी खाद्यलगायतका राहत सामग्रीले बाढीपहिराबाट विस्थापित परिवारको जीवनयापनमा सहयोग पुग्ने ढकालको विश्वास छ। न्यालम काउन्टीले सिन्धुपाल्चोकका लागि यसअघि पनि विभिन्न सहयोग गर्दै आएको छ।
