काठमाडौं । नेपाल कम्युनिष्ट पार्टी (नेकपा) भित्र देखिएको समस्या समाधानका लागि छ सदस्य रहेको कार्यदल गठन भएको छ ।
शुक्रबार बिहान अध्यक्षद्वय केपी शर्मा ओली र पुष्पकमल दाहालबीच भएको छलफलपछि पार्टीको आन्तरिक जीवनमा देखिएका समस्या समाधान गरी पार्टीलाई एकताबद्ध र एकढिक्का बनाउँदै अघि बढाउनका लागि दुबै नेता सहमत भएका थिए ।
दुबै नेता सहित अन्य शीर्ष नेताहरुको सहमतिपछि महासचिव बिष्णु पौडेलको संयोजकत्वमा शंकर पोखरेल, जनार्दन शर्मा, भीम रावल, सुरेन्द्र पाण्डे र पम्फा भूषाल रहेको कार्यदल गठन भएकाे छ । कार्यदललाई छिटो भन्दा छिटो प्रतिवेदन तयार पारी शीर्ष नेताहरुलाई बुझाउने जिम्मेवारी दिइएको छ ।
प्रधानमन्त्री एवं पार्टी अध्यक्ष ओलीले एक साताभित्रै पार्टीभित्र उत्पन्न विवाद समाधान भइसक्ने घाेषणा गरेलगत्तै सहमतिकाे खाेजी गर्न दुइ अध्यक्षबीच वार्ता शुरू भएका छन् ।
