काठमाडौँ । सुडी समाज काठमाडौँले विभिन्न क्षेत्रमा महत्त्वपूर्ण योग्दान पुर्याउने व्यक्तिलाई सम्मान गरेको छ । सुडी समाज काठमाडौँको आज भक्तपुरमा आयोजित १५औँ वार्षिक साधारणसभा तथा सुडी पारिवारिक मिलन समारोह (वनभोज) कार्यक्रममा समाजको विकास र उन्नयनमा उल्लेखनीय योगदान पुर्याएबापत चार जना ज्येष्ठ नागरिकसहित विभिन्न व्यक्तित्वहरूलाई सम्मान गरेको हो ।
समाजका पूर्वअध्यक्ष तथा नेकपा एमालेका केन्द्रीय सदस्य जुली महतो, सुडी समाज महासङ्घ नेपालका अध्यक्ष परमेश्वर महासेठ र समाजका अध्यक्ष शीतलप्रसाद महतोले संयुक्त रूपमा ७२ वर्षमाथि उमेरसमूहका डा शङ्करप्रसाद साह सुडी, रामप्रताप पञ्जियार, विष्णु पूर्वे र जगदम्वा देवीलाई दोस्सला ओढाएर सम्मान–पत्रद्वारा सम्मान गर्नुभयो ।
यसैगरी इञ्जिनियरिङ्ग सेवातर्फ नेपाल भ्यालुयर्स एसोसिएसनका अध्यक्ष इञ्जिनियर सञ्जय महतो तथा चिकित्सकतर्फ नेपाल डेन्टल एसोसिएशनका अध्यक्ष डा अजयकुमार साहर नेपाल दृष्टि विशेषज्ञ सङ्घका अध्यक्ष दीपक साहलाई प्रशंसा पत्रद्वारा सम्मान गरियो ।
त्यस्तै एसइई –२०८१ को परीक्षामा छात्रतर्फ चार जिपिए ल्याएर उर्तीण हुने रविराज पूर्वे तथा छात्रातर्फ ३ दशमलव ९६ जिपिए ल्याएर उर्तीण हुने बन्दना साहलाई नगदसहित सम्मानद्वारा सम्मान गरियो । पुरस्कारको राशि पाँच हजार एक सय पाँच रूपैयाँ रहेको छ ।
सभामा समाजद्वारा प्रकाशित समाजको गतिविधिसम्बन्धी बुलेटिनको विमोचन गरिएको छ । सो अवसरमा एमालेका केन्द्रीय सदस्य जुली महतोले ज्येष्ठ नागरिकको अनुभवले आउँदो पुस्ता लाभान्वित हुने बताउँदै ज्येष्ठ नागरिक सिङ्गो समाजको अनुभवका जिउँदो प्रतिमूर्ति र इतिहास भएको उल्लेख गर्नुभयो । समाजमा अहिले व्याप्त रहेको नकारात्मक सोच र विचारले समाज सबल र समृद्ध हुन नसक्ने उल्लेख गर्दै उहाँले समाजको अग्रगामी रूपान्तरणका लागि नयाँ योजना र दृष्टिकोण आवश्यक रहेको बताउनुभयो ।
सुडी समाज महासङ्घ नेपालका अध्यक्ष परमेश्वर महासेठले समाजप्रति समर्पित भएर सुडी समुदाय र समाजको गरिमालाई उच्च पार्नका लागि सुडी समाज काठमाडाँैंको भूमिका र समर्पण महत्त्वपूर्ण रहेको बताउँदै सुडी समुदायका व्यक्तिबीच मैत्रीपूर्ण एंव पारस्परिक सम्बन्ध कायम गर्ने तथा सामाजिक, शैक्षिक, आर्थिक र स्वास्थ्यलगायत क्षेत्रको विकास, उन्नयन र सुडी समुदायको कल्याणका लागि समाज सक्रिय रूपमा लाग्नुपर्ने आवश्यकता रहेको औँल्याउनुभयो ।
समाजका शीतलप्रसाद महतोले जीवनका अधिकांश समय विभिन्न क्षेत्रमा क्रियाशील रही आफ्नो, ज्ञान र सीपलाई समाज उपयोगी कार्यमा लगानी गर्नुभएका ज्येष्ठ नागरिक समाजका धरोहर र मार्गनिर्देशका रूपमा आदरणीय हुनुहुन्छ, भन्दै समाजको अग्रगामी रूपान्तरणका लागि हामी सबैले सकारात्मक सोचका साथ अघि बढ्नुपर्ने आवश्यकतामाथि जोड दिनुभयो ।
सभामा समाजका महासचिव डा प्रकाशचन्द्र पञ्जियारद्वारा प्रस्तुत समाजको सङ्गठनात्मक प्रतिवेदन र कोषाध्यक्ष विनोद महासेठद्वारा प्रस्तुत समाजको आर्थिक (आय–व्यय) प्रतिवेदनलाई सर्वसम्मत रूपमा पारित गरियो । सभामा समाजका प्रथम उपाध्यक्ष शङ्कर साह सुडी र सचिव वीरेन्द्रकुमार साहलगायतले सबल र समृद्ध समाज निर्माणका लागि समाजका सबै सदस्यबीच आपसी एकता, मित्रता, सहयोग र सद्भाव आवश्यक रहेको उल्लेख गर्नुभयो । रासस
