पाकिस्तान। पाकिस्तानको राजधानी इस्लामावादमा एक विवाह समारोह भइरहेको घरमा भएको ग्यास विष्फोटमा परी नवविवाहित दम्पतीसहित मृत्यु हुनेको संख्या आठ पुगेको छ ।
स्थानीय अधिकारीहरूकाअनुसार आईतवार भएको उक्त घटनामा अन्य ११ जना घाइते भएका छन् । इस्लामावादका डेपुटी कमिश्नर इरफान नवाज मेमनले स्थानीय समय अनुसार राति करिव २ बजे एक आवासीय भवनमा विवाह उत्सव चलिरहेका बेला विष्फोट भएको जानकारी दिनुभयो ।
विष्फोटका कारण आसपासका संरचनाहरूमा समेत क्षति पुगेको छ । हालसम्म भग्नावशेषमा फसेका १९ जनाको उद्धार गरिएको छ ।घाइतेहरूलाई उपचारका लागि नजिकैको अस्पतालमा भर्ना गरिएको छ ।
उद्धार टोलीका अनुसार विष्फोटबाट वरपरका कम्तीमा चारवटा घर प्रभावित भएका छन् । विष्फोटको वास्तविक कारण पत्ता लगाउन विस्तृत अनुसन्धान भइरहेको अधिकारीहरूले बताएका छन् । (सिन्ह्वा/ न्युज एजेन्सी नेपाल)
