काठमाडौं । पर्वत जिल्लाको कालीगण्डकी नदी किनारमा सोमबार साँझ एक दुखद घटना भएको छ।
जलजला गाउँपालिका–८ का २५ वर्षीय विशाल विक प्रहरी जाँचका क्रममा भाग्ने प्रयास गर्दा नदीमा हाम फालेर बेपत्ता भएका हुन्।
जिल्ला प्रहरी कार्यालयका अनुसार कुश्मा नगरपालिका–१ मालढुङ्गास्थित अस्थायी प्रहरी पोष्टमा नियमित सवारी जाँच भइरहेका बेला बागलुङबाट बालुवा बोकेर आइरहेको ट्रकमा सवार विक अचानक भाग्दै कालीगण्डकी नदीमा हाम फालेका थिए।
घटनापछि उनको अवस्था अझै अज्ञात रहेको छ। रातको समयमा खोजी कार्यमा कठिनाइ आएपछि मंगलबार बिहानदेखि प्रहरी र सशस्त्र प्रहरीको संयुक्त टोलीले व्यापक खोजी अभियान सञ्चालन गरिरहेको छ।
घटनाप्रति परिवारजनले भने असन्तुष्टि जनाएका छन्। उनीहरूले प्रहरीले लखेटेका कारण विकले नदीमा हाम फाल्न बाध्य भएको आरोप लगाउँदै विरोध जनाएका छन्। यता उक्त ट्रकका चालक भने फरार रहेका छन्।
