पोखरा । युनाइटेड रेफरेन्स ल्याबोरेटरी (युआरएल) द्वारा स्थापना गरी सञ्चालन गर्दै आएको युआरएल स्वास्थ्य पत्रकारिता पुरस्कार २०७६ बाट पत्रकार सुरेन्द्र पौडेल सम्मानित हुने भएको छ । पत्रकारिताको माध्यमवाट स्वास्थ्य क्षेत्रको विकास र उन्नयनमा उल्लेखनीय योगदान पुर्याउने एक जना पत्रकारलाई प्रत्येक वर्ष सम्मान गरिने सो पुरस्कारको राशि रु १५ हजार र ताम्रपत्र रहेको छ।
नेपाल पत्रकार महासङ्घ कास्की कार्यसमिति सदस्य रहेका पौडेल आर्थिक आवाज अर्धसाप्ताहिक र आर्थिक अभियान राष्ट्रिय दैनिकमा आबद्ध छन् । पत्रकार हरि बाँस्तोलाको संयोजकत्वमा गठित प्रतिभा छनोेट समितिमा डा नवराज पौडेल, अधिकारकर्मी रामबहादुर पौडेल, पत्रकार दीपक परियार र स्वास्थ्य पत्रकार यदुनाथ बञ्जरा रहेका थिए ।
मङ्सिर २३ गते हुने सो संस्थाको छैँटौँ वार्षिकोत्सवका अवसरमा आयोजित एक समारोहका बीच पुरस्कार वितरण गरिने युआरएलका प्रबन्ध निर्देशक ठाकुरप्रसाद पन्तले जानकारी दिए । सो पुरस्कारबाट यसअघि पत्रकार ऋषि खतिवडा र यदुनाथ बञ्जरा सम्मानित भइसकेका छन् ।
