काठमाडाैँ । आज (सोमबार) बिहान ११ बजेका लागि बोलाइएको प्रतिनिधिसभा बैठक अझैसम्म पनि सुरु हुन सकेको छैन। लगातारको राजनीतिक विवाद र विपक्षी दलहरूको अवरोधका कारण संसद् बैठक अनिश्चित बनेको हो।
यसअघि गत मंगलबारको बैठक विपक्षी दलहरूको अवरोधपछि स्थगित भएको थियो। त्यसपछि सभामुख डोलप्रसाद अर्यालले सोमबारका लागि बैठक पुनः आह्वान गरेका थिए। तर, त्यसयता पनि सहमति जुट्न नसक्दा बैठक बस्न सकेको छैन।
विवादको केन्द्रमा जेठ १७ गते प्रधानमन्त्रीले संसदमा दिएको अभिव्यक्ति रहेको छ। आकस्मिक प्रश्नोत्तर सत्रमा प्रधानमन्त्रीले “नेपालले पनि भारतको भूमि मिचेको छ” भन्ने टिप्पणी गरेपछि विपक्षी दलहरूले तीव्र आपत्ति जनाएका थिए। सो अभिव्यक्तिपछि बसेका दुई वटा बैठक पनि अवरोधका कारण अघि बढ्न सकेनन्।
विपक्षी दलहरूले प्रधानमन्त्रीले उक्त अभिव्यक्तिका लागि माफी नमागेसम्म संसद् सञ्चालन हुन नदिने अडान दोहोर्याउँदै आएका छन्।
यसबीच सभामुख अर्यालले पाँच दिनको अवधिमा विपक्षी दलसँग औपचारिक संवाद नगरेको आरोप पनि लागेको छ। सोमबार बिहान मात्र उनले प्रमुख सचेतकहरूसँग छलफल गरेका थिए।
उता, सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछाने ले पनि बैठक सुरु हुने समयअघि सर्वदलीय बैठक आह्वान गरेका थिए। संसद् खुलाउने उपाय खोज्ने प्रयासस्वरूप भएको भनिएको उक्त छलफलले तत्काल कुनै निष्कर्ष निकाल्न सकेको छैन।
दलहरूबीचको तनाव कायमै रहँदा प्रतिनिधिसभा बैठक कहिले सुरु हुने भन्ने विषय अझै अनिश्चित बनेको छ।
