काठमाडौं । रियल मड्रिडले स्पेनिस ला लिगा फुटबलमा इबरलाई पराजित गरेको छ ।
शनिबार आफ्नै घरेलु मैदानमा भएको खेलमा रियल मड्रिडले इबरलाई २–१ गोलअन्तरले पराजित गर्न सफल भएको हो । रियलको जितमा करिम बेन्जिमाले दुई गोल गरे । यता, इबरका लागि भने मार्क कार्डोनाले गोल गरेका थिए ।
सुरुवाती अग्रता भने इबरले बनाएको थियो । खेलको ३९औं मिनेटमा नै कार्डोनाले गोल गर्दै इबरलाई अग्रता दिलाएका थिए । उनकै गोलले पहिलो हाफसम्म इबरले रियलमाथि १–० गोलको अग्रता बनाएको थियो ।
५९औं मिनेटमा रियलले गोल फर्काउन सफल भयो । करिम बेन्जिमाले गोल गर्दै रियललाई १–१ गोलको बराबरीमा ल्याएका थिए । त्यस्तै, ८१औं मिनेटमा उनले दोस्रो गोल गर्दै रियलको जित सुनिश्चित गराए ।
जितपछि रियलले ३१ खेलबाट ६० अंक बनाएको छ । लिगको शीर्ष स्थानमा रहेको बार्सिलोनाभन्दा रियल १३ अंकले पछि छ । यता पराजित इबरको भने ३१ खेलबाट ३९ अंक छ ।
