वीरगञ्ज । प्रदेश २ सरकारका मुख्यमन्त्री लालबाबु राउतले प्राकृतिक विपदलाई रोक्न नसक्ने बताएका छन् । उनले विपदलाई रोक्न नसक्ने भन्दै हावाहुरी प्रभावितका लागि छिटो भन्दा छिटो घर बनाउने बताए ।
एमबी केडिया सेवा ट्रष्टको तर्फबाट हावाहुरी प्रभावितका लागि प्रदान गरिएको ११ लाख आर्थिक सहयोग बुझ्दै राउतले घर निर्माणका सन्दर्भमा संघीय सरकारसँग समेत कुरा भइसकेको बताउँदै घर प्रदेश सरकारले नै बनाउने दावी गरे ।
‘प्राकृतिक विपदलाई हामीले रोक्न सक्दैनौं, हामीले सक्ने भनेको जो पीडित छन्, जो दुःखी छन्, उनीहरुको चोटमा मल्हम लगाउने हो । उनले भने, ‘घर निर्माणका सम्बन्धमा प्रधानमन्त्रीसँग मेरो कुरा भएको छ । उनले प्रधानमन्त्रीसँग कुरा गर्दा सेना मार्फत प्रभावितको घर बनाउने सहमति भएको जानकारी दिए ।
धेरै संघसंस्था, उद्योगीहरु ठूलो परिमाणमा सहयोग गर्न तयार रहेको बताउँदै उनले सबै मिल्दा छिटो भन्दा छिटो घरबार बिहीन बनेका हावाहुरी प्रभावितको घर बन्ने बताए ।
गत आइतबार साँझ आएको हावाहुरीका कारण बारा र पर्सामा २८ जनाको मृत्यु भएको थियो भने झण्डै २ हजार घरधुरी घर बिहीन बनेका छन् ।
