काठमाडाैंः नेपाली कांग्रेसका सभापति शेरबहादुर देउवाविरुद्ध सर्वोच्च अदालतमा परेको अवहेलना मुद्दा खारेज भएको छ ।
प्रधानन्यायाधीश ओमप्रकाश मिश्र र न्यायाधीश बमकुमार श्रेष्ठको संयुक्त इजलाशले देउवा विरुद्धको रिट शुक्रबार खारेज गरेको हो । प्रहरी महानिरीक्षक नियुक्तिको विषयमा कांग्रेसले अदालतको अवहेलना गरेको भन्दै देउवा विरुद्ध रिट परेको थियो ।
महानिरीक्षक नियुक्तिबारे सर्वोच्चले गरेको फैसलाले कार्यपालिकाको अधिकारमा हस्तक्षेप गरेको निर्णय कांग्रेस केन्द्रीय समितिले गर्दा अदालतको अवहेलना भएको भन्दै अधिवक्ता हरिप्रसाद मैनालीले २०७३ साल चैत १५ गते कांग्रेस र देउवा विरुद्ध सर्वोच्चमा रिट दायर गर्नुभएको थियो ।
तत्कालीन डीआइजी जयबहादुर चन्दलाई आईजीपी बनाउने सरकारको निर्णयविरुद्ध तत्कालीन प्रधानन्यायाधीश सुशीलका कार्कीको इजलासले बदर गरेपछि कांग्रेसले न्यायपालिकाले कार्यपालिकामाथि हस्तक्षेप गरेको निर्णय गरेको थियो ।
