मिलान । इटालियन सिरी ‘ए’ को डिफेन्डिङ च्याम्पियन युभेन्टस शनिबार यसै सिजन मात्र बढुवा पाएको बेनेभेन्टोसँग १–१ को बराबरीमा रोकिएको छ । यस सिजन युभेन्टसले खेलेका लिगका नौ खेलमध्ये यो उसको पाँचौं बराबरी हो ।
यो खेलमा युभेन्टसले क्रिस्टियानो रोनाल्डोलाई आराम दिएको थियो । उनको अभाव खेलमा प्रस्ट देखियो । अल्भारो मोराटाले २१ औं मिनेटमा युभेन्टसलाई अग्रता दिलाएयता जाटानो लेटिजाले पहिलो हाफको अन्त्यतिर बराबरी गोल गरे ।
लिगमा युभेन्टस अपराजित रहे पनि रोनाल्डोविनाको खेल जित्न सकेको छैन । यो नतिजापछि टिम १७ अंकसाथ पाँचौं स्थानमा छ । यो शीर्ष स्थानमा रहेको एसी मिलानसँग तीन अंकको दूरी हो । बेनेभेन्टो भने १० अंकमा छ ।
