काठमाडौँ । राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्रको मुद्दामा थुनछेक बहस सकिएको छ ।
मंगलबार न्यायाधीश तारादेवी महर्जनको इजलासमा वरिष्ठ अधिवक्ताहरु गोविन्द बन्दी, भिमार्जुन आचार्य, राजु बस्नेत र सतिशकृष्ण खरेलले मिश्रको तर्फबाट बहस गरेका थिए भने सरकारी वकिलका तर्फबाट ८ जनाले बहस गरेका थिए ।
सुनुवाइ सकिएकाले आदेश लेखनको कार्य भइरहेको छ ।
थुनछेक बहसको अन्तिममा मिश्रले आफ्नो भनाइ राख्दै आफ्नी ८२ वर्षीया आमाको कसम खाँदै राज्यविरुद्धको कसुर नगरेको दाबी गरे । साथै, आमाको हेरचाह गर्नुपर्ने भएकाले आफू भागेर कतै नजाने पनि उनले बताए ।
तीनकुने घटनामा प्रतिवादी बनाइएका उनी मङ्गलबार बिहान आफैँ अदालतमा उपस्थित भएका हुन् । गत जेठ ११ मा मिश्र विरुद्ध राज्य विरुद्धको कसुर, आपराधिक उपद्रव, सङ्गठित अपराध र एकीकृत कसुरमा सजाय हुन मागदावी लिइएको हो ।
तीनकुने घटना भएको चैत १५ कै राति मिश्र पक्राउ परेका थिए । सोही मुद्दामा सोमबार राप्रपाका महामन्त्री धवलशमशेर राणा ३ लाख धरौटीमा रिहा भएका थिए ।
