एजेन्सी । अष्ट्रेलिया आइसिसी टि-२० विश्वकप २०२१ को फाइनलमा पुगेको छ ।
दोस्रो सेमिफाइनल खेलमा अष्ट्रेलियाले पाकिस्तानलाई ५ विकेटले हराउँदै दोस्रो पटक टि२० विश्वकपको फाइनलमा स्थान बनाएको हो ।
जितको लागि १ सय ७७ रनको विजयी लक्ष्य पछ्याएको अष्ट्रेलियाले १९ ओभरमा ५ विकेट गुमाउँदै लक्ष्य पूरा गर्यो ।
अष्ट्रेलियालाई जित दिलाउन विकेटकिपर म्याथ्यु वेड १७ बलमा २ चौका र ४ छक्का सहित ४१ रनमा अविजित रहे भने मार्कस स्टोइनिस ३१ बलमा २ चौका र २ छक्का सहित ४० रनमा अविजित रहे ।
अष्ट्रेलियाका लागि ओपनर डेभिड वार्नरले सर्वाधिक ४९ रन जोडे । अर्का ओपनर तथा कप्तान आरोन फिन्च शुन्य रनमा आउट हुँदै पेभिलियन फर्किएका थिए । मिचेल मार्सले २८ रन बनाए भने स्टेभन स्मिथले ५, ग्लेन म्याक्सवेलले ७ रन जोडे ।
पाकिस्तानका शाहब खानले ४ तथा शाहिन साह अफ्रिदीले १ विकेट लिए ।
यसअघि, दुबईको अबुधाबीमा टस हारेर पहिले ब्याटिङ थालेको पाकिस्तानले निर्धारित ओभरमा ४ विकेट गुमाएर १ सय ७६ रन बनाएको थियो ।
पाकिस्तानका लागि मोहमद रिजवाल र फकर जमानले शानदार अर्धशतकीय इनिङ्स खेलेका थिए ।
रिजवानले ५२ बलमा ३ चौका र ४ छक्का प्रहार गर्दै ६७ रन बनाए । यस्तै जमान ५५ रनमा नटआउट रहे । उनले ३२ बलमा ३ चौका र ६ छक्का प्रहार गरे ।
कप्तान बाबर आजमले ३९ रन जोडे । अष्ट्रेलियाका मिचेल स्टार्कले २ तथा एडम जाम्पा र प्याट कुमिन्सले समान १–१ विकेट लिए।
अब अष्ट्रेलियाले उपाधिको लागि आइतबार न्युजिल्यान्डसँग खेल्नेछ ।
