काठमाडौं । सरकारले आइतबारबाट कोभिड १९ विरुद्धको खोप नलगाएका तोकिएका दीर्घ रोग भएका १२ वर्षमाथि उमेर समूहका व्यक्तिहरुलाई फाइजर खोप दिने भएको छ ।
जसअनुसार खोपको पहिलो मात्रा कात्तिक २८ गतेदेखि मंसिर ४ गतेसम्म दिइनेछ भने दोस्रो मात्रा मंसिर २७ गतेदेखि पुस २ गतेसम्म दिइन लागिएको हो । यो खोप २१ देखि २८ दिन भित्रमा दुई मात्रा लिनुपर्ने हुन्छ ।
स्वास्थ्य तथा जनसंख्या मन्त्रालयका अनुसार खोप लगाउन जाँदा दीर्घरोगीले अस्पताल वा चिकित्सकले जारी गरेको दीर्घ रोगको उपचार सम्बन्धी पुर्जा लिएर तोकिएको अस्पताल जानुपर्ने छ ।
कोभ्याक्स सुविधा अन्तर्गत अमेरिकाले उपलब्ध गराएको १ लाख डोज खोप दिने भएको हो । खोप लगाउन काठमाडौँ उपत्यकामा ८ र उपत्यका बाहिर १६ वटा अस्पताललाई खोप केन्द्रको रुपमा तोकिएको छ ।
खोप पाउने लक्षित वर्गहरुः
मुटुको शल्यक्रिया गराएका वा औषधि सेवन गरिरहेका
जुनसुकै प्रकारको क्यान्सरको उपचार गराइरहेका
फोक्सोसम्बन्धी रोगको औषधि सेवन गरिरहेका
अंग प्रत्यारोपण गरेका
मृगौला फेरेका, डायलाइसिस गराइरहेका वा औषधि सेवन गरिरहेका
मस्तिष्क र मस्तिष्कका रक्तनली सम्बन्धी रोग भएका
उच्च रक्तचाप वा मधुमेह भइ उपचार गराइरहेका
रोग प्रतिरोधात्मक क्षमता कम भएका अवस्थाका
